کندهار کې د ګول سیخونو دغه تولیدي کارخونه د ۲.۵ میلیونه امریکايي ډالرو په پانګونې جوړه شوې او تازه يې فعالیت پیل کړی.
د دغې کارخونې مسوولان وايي، ۲۰۰ کسانو ته یې کاري فرصتونه ایجاد کړي او هر ورځ تر ۱۵۰ ټنو پوري ګول سیخ تولیدوي.
د مسوولانو په خبره، د کافي برېښنا نشتوالي یې د فعالیت کچه ټیټه کړې چې له پوره کېدو سره به یې تولیدات او کاري فرصتونه دواړه زیات شي.
د ګول سیخونو د دغې کارخونې مسوول تورجان فضلي وايي: « که حکومت موږ ته پوره برېښنا راکړی، یانې زموږ برېښنا ۲۴ ساعته شي، زموږ د تولید او کارګرانو شمېر به هم دوه چنده شي. له دې سره به زموږ د کارګرانو شمېر ۴۰۰ تنو او د تولید کچه تر ۳۰۰ ټنو لوړه شي.»
په یاده فابریکه کې په کار بوخت ځوانان له حکومته غواړي چې په خصوصي سکټور کې لا ډېرې پانګونې ته زمینه برابره کړي، ترڅو بېروزګاره خلکو ته د کار زمینه برابره شي.
د تولیدې کارخونې کارکوونکی عبدالحکیم وايي: « موږ ډېر خوښ یو چې دلته د کار زمینه راته برابره شوې، له سوداګرو غوښتنه کوو چې دا ډول نورې کارخونې هم جوړې کړي او خلکو ته د کار زمینه برابره کړي.»
د کارخونې کارکوونکی محمد الله وايي: « بېکاري له حده وتلې او زښت زیات خلک وزګار دي. ما خپله ډېر وخت بېکاري تېره کړه، خو اوس دلته په کار بوخت یم. زه له حکومت او سوداګرو غوښتنه کوم چې دا ډول کارخونې لا ډېرې کړي.»
په همدې حال کې، د کندهار د صنعت او کانونو خونې مسوول وايي، د دې فابریکې له پرانستل کېدو سره په کندهار کې د اوسپنیزو توکو د تولیدي فابریکو شمېر شپږو ته ورسېد.
د نوموړي په خبره، حکومت باید په هېواد کې د اوسپنې کانونو د استخراج زمینه برابره کړي، ترڅو کورنۍ فابریکې د بهرنیو هېوادونو پر ځای خپل لومړني خام مواد د افغانستان له کانونو څخه ترلاسه کړي.
د کندهار صنعت او کانونو خونې رییس سید سرور اماني وايي: « کندهار کې د ګول سیخونو او انګلارن د جوړولو فابریکې نور کفایت کوي او موږ ځان بسیاینې ته رسېدلي یو. له دې وروسته باید موږ له خپلو کانونو څخه اوسپنه استخراج کړو او بیا یې پخه کړو. موږ اوس هم ډېره اوسپنه له بهرنیو هېوادونو واردوو. که موږ خپلو معدونو څخه کار واخلو او خامه اوسپنه هم دلته تولید کړو، زموږ د کار موندنې شمېر به لسګونه چنده ډېر شي.»
مسوولین دغه راز وايي، په کندهار کې د ګول سیخونو د تولیدي فابریکو د شمېر له زیاتېدو سره، د دې ولایت د بازار اړتیا په بشپړه توګه پوره شوې او د دغو فابریکو د تولیداتو یوه برخه د هېواد نورو ولایتونو ته هم لېږل کېږي.
