هرات کې د ګلبهار سمنتو تولید کارخونې ساختماني چاري د کانونو او پټرولیم وزارت له خوا پیل شوې.
د یاد وزارت مسوولین وایي، یاده کارخونه به د ۱۴۳ میلیونه امریکايي ډالرو په پانګونې سره د دوو کلونو په موده کې جوړه شي چې په ورځني ډول به یې لومړی فاز څلور زره ټنه سمنټ تولید کړي.
د کانونو او پټرولیم وزارت مسوولین دغه راز وایي، ټول افغانستان کې یې د سمنټو د تولید په برخه کې ۸ کارخونو باندي ۷۷۵ میلیونه امریکايي ډالرو پانګونه کړې چې د تولیدي فعالیت په پیل کېدو سره به یې هېواد د سمنټو په برخه کې پر ځان بسیا شي.
د کانونو او پټرولیم وزیر هدیت الله بدري وايي: « زموږ د شمېرو له مخې، یوازې په خصوصي سکټور کې ۷۷۵ میلیون ډالره لګښت کېږي. په دې پروژه کې به ۲۵ زره تنو ته مخامخ او په غیر مستقیم ډول د کار زمینه برابره شي. د دې کارخونې په فعالېدو سره به، د سمنټو له پلوه پرځان بسیا شو او اړ به نه یو چې له نورو هېوادونو یې وارد کړو.»
بله خوا، د ریاست الوزار اقتصادي مرستیال ملا عبدالغني برادر وایي، اسلامي امارت هېڅکله سوداګريزي اړیکې له سیاسي موضوعاتو سره نه دي تړلې او د خپلو ټولو شته امکاناتو څخه په ګټنې هڅه کوي د هېواد اقتصادي زېربناوې ورغوي.
ملا برادر دغه راز ویلي چې هڅه کېږي بانکي محدودیتونه راکم او هېواد کې د پانګونې لپاره زمینه لا پراخه شي.
د ریاست الوزرا اقتصادي مرستیال ملا عبدالغني برادر وايي: « د معاصرو سیاسي اړیکو له نظره، موږ د خپل هېواد سیاسي او اقتصادي جغرافیه د مناسباتو په مرکز بدله کړې، د سرحدي خطرونو کچه مو صفر ته ښکته کړې او هېڅ وخت مو هڅه نه ده کړې چې سوداګري له سیاسي مسایلو سره وتړو.»
د اقتصادي چارو کارپوهان وایي، کورني تولیداتو برخه کې پانګونه به په بهرینو وارداتو باندي تکیه راکمه، ساختماني زېربناوي پیاوړي، د اسعارو وتلو څخه مخنیوی او کاري فرصتونه به لا زیات کړي.
د افغانستان سوداګرۍ او پانګونې خونې رییس سید کریم هاشمي وايي: « موږ باور لرو چې د افغانستان د تلپاتې اقتصادي ودې لپاره باید شته پانګې څومره ژر چې کېږي، د تولیدي، صنعتي او زېربنايي فعالیتونو خواته راښکل شي. د سمنټو صنعت هم په دې برخه کې مهم ځای لري او د هېواد د زېربنايي پروژو اساسي توکی دی.»
د هرات د متخصصانوو شورا رییس محمد رفیق شهیر وايي: « دا ډول پروژې نه یوازې خلکو ته کار پیدا کوي بلکې له هېواد څخه د پانګې وتلو مخنیوی هم کوي، قېمتونه راټیټوي او په ټوله کې خلکو ته د هیلو کړکۍ پرانیزي.»
د هرات سمنټو پروژه د لومړي ځل لپاره د سردار محمد داوود خان واکمنۍ پرمهال جوړه شوې وه چې د تېرو کورنیو جګړو له امله کنډواله شوه.
دا مهال دا سلامي امارت مسوولین وایي، د یادې پروژې له بشپړېدو سره به ۵ زره کسانو ته کاري فرصتونه برابر شي او لومړی فاز به یې په ورځني ډول څلور زره ټنه تولیدي ظرفیت ولري، خو د نورو فازونو په فعالېدو سره به یې ورځنی ظرفیت ۹ زره ټنه ته لوړ شي.
