هرات کې د صنعتي کورتو د تولید یوه کارخونه د پنځه میلیونه امریکايي ډالرو په پانګونې سره فعالیت کوي. دا کارخونه اوس مهال هره ورځ له وچو کورتو څخه پنځه لس ټنه صنعتي کورت (کشک) تولیدوي.
د دې کارخونې مسوولین وایي، د صنعتي کورتو تولید لپاره ټول د اړتیا وړ خام مواد له مالدارانو څخه ترلاسه کوي.
صنعتکار احسان الله خواجهزاده وايي: « دا چې زموږ هېواد کرنیز او مالداره دی، نو موږ د خپلې اړتیا وړ خام مواد له داخل څخه چمتو کوو. زموږ کورني مواد ارګانیک او لاس نه خوړلي دي، نو کیفیت یې هم تر نورو ښه دی. همدا لامل دی چې هم په کور دننه او هم بهر زموږ تولیدي محصولات ښه بازار لري او خلک یې خوښووي.»
د مسوولینو په خبره، اوس مهال ۲۰۰ کسان په مستقیم ډول په دې کارخونه کې پر کار بوخت دي او شاوخوا ۹۰ سلنه خام مواد یې د هېواد له بېلابېلو ولایتونو څخه د کروندګرو او مالدارانو له تولیداتو راټولېږي.
په دې کارخونه کې په کار بوخت کسان وایي، د هرات صنعتي ښارګوټي کې کار کول د کورنیو اقتصادي ستونزو له کمولو سره مرسته کړې.
د صنعتي کارخونې کارکوونکی حامد وايي: « دا چې یو څوک خپل هېواد پرېږدي، مهاجر شي او بیا په لارو ووژل شي یا په بحرونو کې ډوب شي، که په خپل هېواد کې کار وکړي، ښه ده. باید ټولو ته د کار زمینه برابره شي.»
یو بل کارکوونکی فیض احمد وايي: « له حکومت او سوداګرو هیله لرو چې ځوانانو ته د کار زمینه برابره کړي، ښه راتلونکې ولري او نورو هېوادونو ته لاړ نه شي.»
بله خوا، د هرات د صنایعو او کانونو خونې مسوولین له هېوادوالو غواړي چې د کورنیو تولیداتو په کارولو سره د هېواد له صنعت او کرنې ملاتړ وکړي.
د دوی په خبره، د کورنیو کارخونو وده د کروندګرو د محصولاتو لپاره د تقاضا د زیاتېدو، له هېواده د پانګې وتلو د مخنیوي او د ملي اقتصاد د پیاوړتیا لامل کېږي.
د هرات صنایعو او کانونو خونې مرستیال محمد نعیم شریفي وايي: « زموږ ملت باید له صنعتکار، کروندګرو او مالدارانو ملاتړ وکړي او له دې سره موږ کولی شو پر ځان بسیا شو. هغه څه چې موږ ورته اړتیا لرو، په کور دننه یې چمتو کوو او دا ټولو ته ګټه رسوي.»
له دې سربېره، د هرات سیمهییزه اداره هم د صنعتکارانو د هر اړخیز ملاتړ خبره کوي او ټینګار کوي چې هرات د هېواد په کچه په یوه مهم صنعتي مرکز بدل شوی.
د هرات د والي ویاند محمد یوسف سعیدي وايي: « د هرات ولایت محلي ادارې خلکو ته د کاري فرصتونو برابرېدو لپاره، د هېواد له مختلفو صنعتي تولیداتو ملاتړ کړی. هڅه کېږي د هرات او ټول هېواد صنعت ورځ تر بلې پراختیا ومومي، ترڅو خلکو ته د کار او هېواد ته د ځان بسیاینې زمینه برابره شي.»
افغانستان یو کرنیز او مالدار هېواد دی، له همدې امله د لبنیاتو د تولید او پروسېس په برخه کې د خامو موادو پراخ ظرفیت لري.
په هېواد کې د شیدو او نورو لبنیاتو تولید کولی شي د خوراکي توکو د صنعت له ودې، د کروندګرو او مالدارانو د ملاتړ او د خلکو لپاره د کاري فرصتونو رامنځته کولو کې مرسته وکړي.
