د هرات کرنې او مالدارۍ ریاست مسوولین وایي، د روان لمریز کال په ترڅ کې هلته د شاتو تولید ۲۵۰ ټنه ته لوړ شوی. د دوی په وینا، دا شمېر د تېر کال په پرتله د شاتو په تولید کې۸۰ ټنه زیاتوالی ښيي چې د شاوخوا ۳۰ زره صندوقه مچیو څخه ترلاسه شوي دي.
د هرات کرنې، اوبو لګولو او مالدارۍ ریاست د مالدارۍ آمر محمد عمر قاصد وايي: « له نېکه مرغه باید ووایم چې هرات کې سږ کال د شاتو د تولید کچه د نورو کالو په پرتله لوړه او موږ تر ۲۵۰ ټنو پورې شات راټول کړي دي. موږ دا مهال هرات ولایت کې ۳۰ زره صندوقه د شاتو مچۍ لرو او دا کچه د ودې په حال کې ده.»
بله خوا، د شاتو مچیو روزنې فارم لرونکي وایي، سره له دې چې سږ کال یې د تولید کچه زیاته شوې خو په عصري بڼه د مچیو روزنې لپاره د امکاناتو نه شتوالي او بازار کې د بې کیفیت شاتو شته والي یې پر وړاندي جدي خنډونه جوړ کړي.
دوی له اړوند مسوولینو غواړي چې د شاتو روزنې او تولید په برخه کې د مسلکي زدهکړو او روزنیزو پروګرامونو زمینه ورته برابره کړي.
فارم لرونکی جهانګیر الکوزی وايي: « موږ ته د ې امکانات برابر شي، ترڅو صنعتي او تخصصي کار وکړو. باید موږ ته داسې ماشینونه راکړل شي چې موږ د مچیو زهر او د ګلانو ګرده هم ټول کړو او نورو هېوادونو ته یې صادر کړو.»
د شاتو مچیو روزنې فارم لرونکي د کورنيو شاتو کیفیت د وارداتي هغو په پرتله ښه بولي او ټينګار کوي چې د حکومت له لوري د ملاتړ په صورت کې به یې د شاتو تولیدي فارمونو زیاتوالي سره، ګڼ شمېر بې روزګاره خلګو ته د کار زمینه هم برابره شي.
فارم لرونکی کیهان وايي: « زموږ د شاتو ټولولو مېتود دودیز دی، خو که حکومت همکاري وکړي، وسایل او روزنه راکړي؛ موږ کولی شو د شاتو ترڅنګ، د ګلانو ګرده او د مچیو زهر هم راټول کړو.»
د شاتو فارم لرونکی امېد وايي: « بازاري شات صنعتي دي او دا زموږ بیا ارګانیک دي. دا چې موږ خپلو مچیو ته طبي ګلان ورکوو، نو شات یې ډېر مقوي او ګټور دي.»
د رسمي شمېرو له مخې، تېر کال په هرات کې شاوخوا ۱۷۰ ټنه شات تولید شوي وه، خو سږ کال د تولید دا کچه ۲۵۰ ټنو ته لوړه شوې. مسوولین دغه راز زیاتوي چې د شاتو مچیو فارم لرونکو څخه ملاتړ او په بازارونو کې د بې کیفیته شاتو مخنیوي په موخه یې سږ کال نږدې ۶۰۰ کیلو بې کیفیته او تقلبي شات راټول کړي او له منځه وړي دي.
