هر کال په افغانستان کې د میلیاردونو افغانیو په ارزښت بانکنوټونه د ډېر استعمال له امله زړېږي او د چلښت له دورې وځي.
افغانستان بانک وایي، د برېښنایي بانکدارۍ پراختیا نه یوازې مالي راکړه ورکړه اسانه کوي بلکې د افغانيو بانکنوټونو د ساتنې او د چاپ لګښتونو په کمولو کې هم مهم رول لري.
د یاد بانک ویاند شمشاد ته وایي، له شمال او شمال ختیځ زونونو څخه راټول شوي د څه باندې ۱ میلیارد او ۱۴۱ میلیونو افغانیو په ارزښت زاړه بانکنوټونه په بلخ کې سوځول شوي دي.
حسیب الله نوري زیاتوي: « د بانک نوټونو ساتل ملي مسوولیت دی او موږ له درنو هېوادوالو غواړو چې د راکړه ورکړې پرمهال د افغانیو بانک نوټونو ساتنې ته پوره پاملرنه وکړي، ترڅو له وخت وړاندې مندرېس نه شي. موږ همدا تېره اوونۍ څه باندې یومیلیارد او ۱۴۱ میلیونه افغانۍ بانک نوټونه چې د هېواد له شمال او شمال ختیځ زون څخه راټول شوي وو، وسوځول او له ګردښت څخه مو و ایستل.»
د اقتصادي چارو کارپوهان وايي، په کلني ډول د میلیاردونو افغانیو له لاسه تلل بیا په اقتصاد منفي اغېز کوي. دېته په کتو، د افغانستان بانک مسوولین وایي هڅه یې روانه کړې چې د برېښنایي بانکدارۍ لپاره زیاد کار وکړي.
د افغانستان بانک ویاند په دې اړه وايي: « د دې لپاره چې په افغانستان کې نغده بازار کم شي، د افغانستان بانک د برېښنايي بانکوالۍ د ترویج په برخه کې کار کوي. دا مهال د اف پې په نوم کارت چې یو ملي کارت دی او د افغانستان بانک ډيزاین کړی، په ټولو سوداګریزو بانکونو او تادیاتي موسساتو کې فعال او د چلښت وړ دی. هغه درانه هېوادوال چې دا کارت ولري، کولی شي له اسانتیاوو یې برخمن شي. زموږ غوښتنه دا ده چې د دې کارت په اخستلو سره د نغدي بازار په راکمولو او د برېښنايي بانکوالۍ د ترویج په برخه کې همکاري وکړي.»
بل پلو، د چارو شنونکي د افغانستان پولي واحد(افغانۍ) بانکنوټونو مندرېس کېدو ته په اشارې وایي، دا چاره منفي اغېزې درلودلی شي او ټینګار کوي چې د پیسو د ساتنې په موخه دې لازمې پالیسۍ جوړې او عملي شي.
د اقتصادي چارو شنونکی محمد عیسی مبارز وايي: « موږ نه یوازې دا باید زده کړو چې پیسې څنګه مصرف کړو بلکې باید د پيسو ساتنه هم زده کړو. لکه څرنګه چې موږ د بهرنیو کرنسیو بانک نوټونه ښه ساتو، باید همداسې باید افغانۍ هم وساتو. البته باید ووایم چې د افغانیو بانک نوټونو کیفیت څه کم دی، باید د ساتنې لپاره یې ښه مدیریت وشي. »
د افغانستان بانک دغه راز وايي، سږ کال د هېواد په کچه د ۲میلیارده، ۵۴۱ میلیونه او ۶۴۵زرو افغانیو په ارزښت زاړه بانک نوټونه راټول او سوځول شوي دي.
د بانک د مسوولینو په خبره، په همدې موده کې د پیسو د ټولیز ګردښت ارزښت ۴۰۹میلیارده افغانیو ته رسېدلی.
د افغانستان بانک د دغو بانک نوټونو د سوځولو موخه په بازار کې د نغدو پیسو ښه مدیریت او د افغانیو د اعتبار ساتل بللي دي.
