د افغانستان سوداگرۍ او پانګونې خونې چارواکي وايي، د دې ادارې یو شمېر چارواکو قرغېزستان ته د رسمي سفر پر مهال، د دې هېواد سوداګرۍ او اقتصاد له وزیر سره لیدلي.
د سوداګرۍ او پانګونې خونې ویاند له شمشاد سره په خبرو کې تایید کړه چې افغان چارواکو د بشکېک له سوداګرۍ او اقتصاد وزیر سره په لیدنه کې پر ګډې سواګرۍ او پانګونې خبرې کړې. د هغه په خبره، دواړو لورو د کابل او بشکېک ترمنځ د سوداګرۍ پراختیا لپاره د نویو فرصتونو پر رامنځته کولو ټنیګار کړی.
د سوداګرۍ او پانګونې خونې ویاند احسان الله احسان وايي: « قرغېزستان ته د رسمي سفر په ترڅ کې د افغانستان د سوداګرۍ او پانګونې خونې رییس د دې هېواد د تجارت او اقتصاد له مرستیال وزیر سره لیدلي. په دې لیدنه کې د افغانستان او قرغېزستان ترمنځ د سوداګرۍ د پراختیا لپاره د نویو فرصتونو پر رامنځته کولو ټینګار شوی او ترڅنګ یې افغان سوداګرو ته د وېزو په ورکړه کې د اسانتیاوو رامنځته کولو او د ګډو همکاریو پر پراختیا هم خبرې شوې.»
په یاده لیدنه کې افغان لوري ټنیګار کړی چې افغانستان د منځنۍ اسیا او جنوبي اسیا سوداګریزو بازارونو د اتصال مهم رول لوبوي او کابل او بشکېک باید د کرنې، صنعت او پانګونې برخو کې همکارۍ لا پیاوړې کړي.
د سوداګرۍ او پانګونې خونې ویاند په دې اړه وايي: « د افغانستان د سوداګرۍ او پانګونې خونې عمومي رییس په دې لیدنه کې روښانه کړې چې افغانستان د منځنۍ او جنوبي اسیا د بازارونو په اتصال کې مهم رول لوبوي او له همدې امله یې د کابل او بشکېک ترمنځ د کرنې، صنعت او پانګونې په برخو کې د همکاریو پر لا ډېرېدو ټینګار کړی.»
بله خوا، اقتصادي چارو شنونکي دا ډول سفرونه خورا مهم بولي او ټنیګار کوي چې له شته فرصتونو باید ګټه پورته شي. دوی همدراز د اړیکو پر رغښت او ټنیګښت ټنیګار کوي.
د اقتصادي چارو شنونکی محمد یونس ځدراڼ وايي: « قرغېزستان ته د افغان اقتصادي پلاوي سفر او دغه راز د منځنۍ اسیا نورو هېوادونو ته سفرونه ډېر اړین دي. موږ باید دامهال د منځنۍ اسیا او نورې نړۍ له هېوادونو سره خپلې اقتصادي اړیکې ټینګې وساتو او له دې فرصت څخه ښه ګټه واخلو. همدارنګه قرغېزستان داسې یو هېواد دی چې کولی شي له موږ سره په اقتصادي پرمختګ کې مرسته وکړي.»
له پاکستان سره د سواګرۍ له بندېدو وروسته، افغانستان له منځنۍ اسیا هېوادونو سره د سوداګریزو اړیکو په رغولو او ټينګښت کې خورا زیاتې هڅې پیل کړې. کارپوهان وايي، دا چاره کولی شي د افغانستان اقتصادي ودې لپاره لوی فرصتونه رامنځته کړي.
