د پنجشیر زمرد په کور دننه او بهر د قېمتي کاڼو په قطار کې خپل ځانګړی نوم او ځای لري. په يوه تازه اقدام کې هلته ۱۲ زره قیراطه استخراج شوي زمرد پلورل شوي دي.
ولایتي چارواکي وایي، په دې ولایت کې څه باندې ۴ میلیونه، ۷۷۰ زره افغانیو په ارزښت نږدې ۱۲ زره قیراطه زمرد پر کورنيو سوداګرو پلورلي دي.
د پنجشېر کانونو ریيس وايي: « په دې داوطلبۍ کې د ۹ زره ۷۷۹ قیراطو په وزن، ۱۰ کارټنه استخراج شوي زمرد د ۷۵ زره ۷۲۰ امریکايي ډالرو په کې پر کورنیو سوداګرو وپلورل شول.»
په ورته مهال، د پنجشېر والي وایي، د اسلامي امارت له بيا واکمنېدو راهيسې تر یوې شفافې پروسې لاندې په دې ولایت کې د کانونو استخراج پیل شوی او په شفاف ډول د پلور لپاره بولۍ ته وړاندې کېږي.
د پنجشیر والي محمد اغا حکيم وايي: « د اسلامي امارت له قیام وروسته پر ملي عوایدو باندې ډېره جدي پاملرنه شوې. د زمردو معادن د یوې شفافې پروسې تر کنټرول لاندې استخراج کېږي او بیا د بولۍ څانګې ته را لېږدول کېږي. د معدن ریاست دنده لري چې دغه پروسه کنټرول کړي او د بیت المال حق وسپاري.»
همدارنګه، د کانونو او قېمتي ډبرو یو شمېر سوداګر وایي، د تېر پرتله د بولۍ او استخراج برخه ډېره شفافه ده او له حکومت غواړي چې د قېمتي کاڼو استخراج او صاداراتو په برخه ورته لا زياتې اسانتیاوې رامنځته کړي.
د قېمتي ډبرو سوداګر شایق وايي: « د پنجشېر زمرد په داخل او بهر کې ښه بازار لري او موږ یې تر پروسېس کولو وروسته په ښه بیه پلورو.»
سوداګر محمد عزیر وايي: « د جمهوریت په پرتله اوس د بولۍ پروسه شفافه ده. موږ له دولت تمه لرو چې د قېمتي ډبرو د صادراتو په برخه کې له موږ سره همکاري وکړي.»
د پنجشېر سیمهییزو چارواکو په خبره، هلته د روان کال په لومړۍ ربع کې ۲۰ زره قیراطه زمرد استخراج شوي چې بیه یې ۴۲۰ زره امریکایي ډالرو ته رسېږي. دوی ډاډ ورکوي چې د کانونو استخراج په برخه کې د ځان بسیاینې لپاره پروګرامونه او طرحې لري.
