د دې سیالیو تنظيموونکي وایي، سیالۍ د سرکاڼو ولسوالۍ پشد کلي په بېلې سيمه کې پيل شوې او په کې پر کونړ سربېره د کابل، لغمان، ننګرهار او نورو ولایتونو لوبډلې هم ګډون لري.
دوی يې موخه د ځوانو لوبغاړو پیدا کول، ورزش ته د ځوانانو هڅول او د نشهيي توکو له کارولو يې خوندي ساتل بولي.
د ټورنمټ مسوول راحت شاه سادات وايي: « له دې ټورنمنټ څخه زموږ موخه دا ده چې ځوانان له نشو څخه را وګرځوو. په دې سیالیو د کلیو، ولسوالیو او ولایت شاوخوا پنځوس لوبډلو ګډون کړی او له نورو لوبډلو سره هم په اړیکه کې یو چې ښايي شمېر یې زیات شي.»
د ټورنمنټ یو بل مسوول شریف الله وايي: « موږ چې کله هر کله دا سیالۍ جوړوو، له ۳۰ تر ۴۰ لوبډلې په کې برخه اخلي چې له کونړ سربېره د ننګرهار او کابل لوبغاړي او لوبډلې هم راځي.»
په ورته مهال، لوبغاړي د دې سیالیو پيل کېدو له امله خوښ دي او له کرېکټ بورډ غوښتنه کوي چې په سرکاڼو کې دې د لوبغاړو ملاتړ لپاره د کرېکټ معیاري لوبغالی جوړ کړي.
دوی دا سیالۍ د پټو استعدادونو پېدا کولو لپاره مهمې بولي او د ورته نورو سیالیو د ترسره کېدوغوښتنه کوي.
لوبغاړی بصیراحمد وايي: « له کرېکټ بورډ غوښتنه کوو چې دغو لوبو ته پاملرنه وکړي. زموږ له همدې لوبو یو شمېر لوبغاړي تر ملي لوبډلې رسېدلي.»
کرېکټ بورډ هم د کورني کرېکټ پیاوړتیا لپاره ورته سیالۍ مهمې بولي او ډاډ ورکوي چې خپلې بودیجې ته په کتو به د ټولو لوبغاړو لپاره اسانتياوې برابرې کړي.
موده وړاندې د کونړ د بدني روزنې او ورزش آمريت له لوري په سرکاڼو کې د ۱۶ لوبډلو ترمنځ د ټېپ بال کرېکټ ترسره شویو سياليو اتلولي ټايګر لوبډلې خپله کړې وه.
