بلخ ولايت کې یو شمېر صنعتکاران وایي، په صنعتي پارکونو کې ډېری ځمکې له کلونو راهیسې بېګټې پاتې دي او هېڅ ډول فعاليت په کې نه دی شوی.
د دوی په خبره، که دا ځمکې هغو پانګوالو ته وسپارل شي چې د فابریکو جوړولو ته لېوالتيا لري، نو دا به د صنعتي پراختیا، اقتصادي ودې او د کاري فرصتونو زیاتوالي لپاره اغېزناک ګام وي.
صنعتکار محمد افضل افضلي وايي: « هغه ځمکې چې په صنعتي پارکونو کې شته او له کلونو راهیسې تشې پرتې دي، ښه خبره دا ده چې هغو کسانو ته وسپارل شي چې واقعا ً د صنعت لپاره کار کوي او تولیدي کارخونې جوړوي.»
صنعتکار عبدالزاهد وايي: « موږ له صنعت او سوداګرۍ وزارت څخه غوښتنه کوو چې له کلونو راهیسې غصب شوې ځمکې هغو صنعتکارانو ته ورکړي چې د ځمکې ستونزې لري.»
ځینې نور صنعتکاران د نوي صنعتي پارک په اړه اندېښنې لري. دوی ادعا کوي چې هلته د ځمکو بیې لوړې دي او د قسطونو د ورکړې موده لنډه ټاکل شوې چې د ډېرو صنعتکارانو له وسې پورته دي.
صنعتکار عبدالزاهد په دې اړه وايي: «دا ځمکې په قسطونو ورکول کېږي او دا صنعتکار ته ګټه نه کوي. زموږ غوښتنه دا ده چې دا قسطونه اوو کالو ته پورته کړي، ترڅو صنعتکارانو ته هم ګټه ورسېږي.»
صنعتکار محمد یاسین عزیزي وايي: « د هېواد د اقتصادي ودې لپاره اړتیا ده چې صنعتکارانو او سترو فابریکه لرونکو ته ډېرې ځمکې ورکړل شي، ترڅو لویې فابریکې جوړې او ډېرو خلکو ته د کار زمینه برابره کړي.»
د بلخ ځايي چارواکي هم د صنعتکارانو ستونزې مني او وایي، هڅه کوي په دې صنعتي پارکونو کې د ځمکو وېش، بیو او نورو اړوندو موضوعاتو لپاره مناسبې حل لارې پيدا کړي.
د بلخ ولایت صنعت او سوداګرۍ رییس امیر محمد متقي وايي: « د صنعت او تجارت وزارت او ولایتي ادارې جدي پرېکړه کړې. د ځمکو پخوانیو کسانو ته وخت ورکړل شوی و او د جوزا په میاشت کې یې وخت پوره کېږي بیا د شکایت حق نه لري. له دې وروسته به موږ له دوی ځمکې بېرته واخلو او نورو صنعتکارانو ته به یې ورکړو. بله خبره دا ده چې په صنعتي ساحو کې باید یوازې صنعتي فعالیت وشي، د بل فعالیت اجازه نه ورکول کېږي. همدارنګه د قسطونو په ډېرولو هم خبرې روانې دي.»
بلخ چې له مهمو صنعتي ولایتونو شمېرل کېږي، سلګونه تولیدي فابریکې په کې فعالیت لري. صنعتکاران باور لري چې د صنعتي ځمکو عادلانه وېش او د پانګونې لپاره د اسانتیاوو رامنځته کېدل کولی شي، د تولیداتو کچه لوړه او د کارموندنې فرصتونه زیات کړي.
