د لومړي ځل لپاره د شاوخوا ۱۰۰ زره امریکایي ډالرو په ارزښت د ښځو او ماشومانو۲۰ زره جوړې جامې عراق ته صادرې شوې.
مسوولین د دې جامو له کیفیت ډاډ ورکوي او زیاتوي چې په پام کې ده، نږدې راتلونکي کې د یو میلیون ډالرو په ارزښت نورې جامې هم یاد هېواد ته صادرې کړي.
هرات کې د جامو تولیدونکو ټولنې رییس عزیز الله نورزی وايي: « له نېکه مرغه موږ وکولی شول چې د ۲۰ ورځو په لړ کې دا محموله چمتو او عراق ته بار کړو. که خدای کول په نږدې راتلونکي کې به د دغو صادراتو د کچې لوړېدو لیدونکي اوسو. موږ دا مهال د ۲۰۰ زره نورو جوړو قرارداد هم ترلاسه کړی.»
ایران سوداګر جواد حکیمي وايي: « هغه محموله چې اوس چمتو شوی او عراق ته لېږل کېږي، ارزښت یې شاوخوا ۱۰۰ زره امریکايي ډالر دی، خو په بل پړاو کې به موږ له خپلو افغان همکارانو سره د شاوخوا یو میلیون ډالرو په ارزښت قرارداد لاسلیک کړو.»
په همدې حال کې د هرات د کسبګرو اتحادیې رییس وایي، د دې ولایت کوچني صنایع، په ځانګړي ډول د لاسي بکسو، بوټانو او جامو د تولید برخه کې، د سیمهییزو بازارونو د سیالۍ لوړ ظرفیت لري او بېلابېلو هېوادونو ته د صادراتو لپاره چمتو دي.
د هرات کسبګرو خونې رییس عبدالقدیر اکبري وايي: « موږ هڅه کوو خپل تولیدات لکه کیف، بوټانو او نورو تولیدات بهر ته صادر کړو. که څه هم زموږ ډېری تولید کړي توکي همدا اوس هم بهر ته صادرېږي.»
بلهخوا، د هرات صنایعو او کانونو خونې مسوولان ټینګار کوي چې د صنعتکارانو ملاتړ او د صادراتو لپاره د زمینې برابرول، هېواد ته نوي اقتصادي فرصتونه رامنځته کولی شي او ډاډ ښيي چې دا ډول صادرات به يې زیات شي.
د هرات صنایعو او کانونو خونې رییس عبدالناصر امین وايي: « موږ تمه لرو چې زموږ له صنایعو لا ډېر ملاتړ او حمایت وشي، ترڅو زموږ هېواد په صادراتي هېواد بدل شي. د ډېرو صادراتو مانا دا ده چې موږ د خپل وطن پانګه ډېروو.»
د یادونې وړ ده چې دا مهال د هرات صنعتي ښارګوټي کې څه باندي ۱۲۰۰ لویي کارخونې فعالیت لري چې له ډلې یې ۱۱۲ هغه صادرات هم لري.
