د کانونو او پټروليم وزارت له يوه کورني او بل بهرني شرکت سره په کندز ولایت کې د ۲۰.۲۴۰ ميليون ډالرو په ارزښت، د سرو زرو د استخراج تړون لاسليک کړ.
تړون شوی کان ۵.۹۷ کيلومټره مربع مساحت لري او د کندز ولایت په قلعهذال ولسوالۍ پروت دی او د قرارداد موده يې پنځه کاله ټاکل شوې.
د کانونو او پټرولیم وزارت ویاند همایون افغان وايي: « د کانونو او پټرولیم وزارت او سبحان مومند شرکت ترمنځ د کندز ولایت قلعه ذال ولسوالۍ د سرو زرو کان د استخراج تړون د پنځو کالو لپاره لاسلیک شو. د دې کان مساحت ۵.۹۷ کیلومټره مربع دی. یاد شرکت به په دې کان کې څه باندې ۲۰.۲ میلیون ډالره پانګونه کوي، اسلامي امارت ته به ۳۰ سلنه رویالټي ورکوي او سلګونه کسانو ته به کاري زمینه برابروي.»
قراردادي شرکت ژمنه کړې چې د ۳۰ سلنه رویالټۍ ورکولو ترڅنګ به ۲۰۰ زره امریکایي ډالر په بېلابېلو ټولنیزو خدمتونو لګوي او همدارنګه به په مستقیم او غیر مستقیم ډول ۱۰۰ کسانو ته د کار زمینه هم برابره کړي.
