Skip to content
هېواد کې وروستیو تحولاتو د روزګار په هره برخه منفي اغیز کړی دی او خیاطان هم له دې اغیز خوندي نه دي.
د پکتیا مرکز ګردیز ښار کې یو شمېر خیاطان وايي، د روژې په وروستیو ورځو کې یې روزګار ښه شوی، خو په خبره یې کاروبار یې د نورو کالونو پرتله کم شوی دی.
دوی وايي،د اقتصادي ستونزو له کبله ډېری خلک د اختر لپاره د خپلو کالیو ګنډلو فرمایش نه ورکوي او یوازې د ماشومانو د کالیو په جوړولو بسنه کوي.
ګردیز ښار کې یو تن خیاط وايي:« مخکې به د خیاطانو کاروبار ښه و،چې یو څوک به راغی، دوه جوړې به یې کولې ، ماشومانو ته به یې هم کول، سږ کال اقتصادي ستونزې ډېرې دي او خلک یوازې د ماشومانو په کالیو جوړولو بسنه کوي.»
ګردیز ښار کې یو بل خیاط بیا وايي:« تقریبا اوس تر ۵۰ جوړې له ماسره پاتې دي،چې نه مو دي ګنډلي او تر اختره باید دا جوړې کړو.»
د ګردیز یو شمیر اوسېدونکي بیا نیوکه لري،چې خیاطانو د کالیو ګنډلو بیې په بې ساري ډول لوړې کړي او دوی یې د جوړولو توان نه لري.
د پکتیا اسېدونکی مشال وايي:« دا څو ورځې کیږي،چې رخت په لاس ګرځوم،خو خیاطانو له یوې خوا بیې لوړې کړي او له بل لوري راته وایي، نه یې جوړوو. زه اوس د اختر لپاره نوي کالي نه لرم.»
خو خیاطان وایي،په عمومي ډول د ښاروالۍ له نرخنامې پورته پیسې نه اخلي او که څوک بیا ځانګړې جوړې غواړي، نو باید یو څه پیسې ور زیاتې کړي.
ګردیز ښار کې یو تن خیاط وايي:« بیې خو له دې کبله لوړې شوي دي،چې هر څه مخکې موږ په یوه بیه اخېستل، اوس یې په لوړ قیمت اخلو،غاړې او نور څه. نو اړ یو چې خیاطان هم بیه لږ څه لوړه کړي.»
د بیو لوړوالي نیوکه یوازې پر خیاطانو نه ده ،بلکې د روژې او د اختر ورځو په را رسیدو هر کال معمولا بازارونو کې بیې لوړیږي،چې د ډېری توکو اخېستل د بې وزلو کورنیو له توانه پورته وي.
