Skip to content
د کندهار ښار یو شمېر اوسېدونکي وايي، د ډالرو د پخوانیو لوړو بیو له امله د خوراکي توکو لوړ شوي قیمتونه لا هم نه دې راښکته شوي.
دوی وایي، اوس چې ډالر د افغانیو پر وړاندې راټيټ شوی،خو د خوراکي توکو بیې لا هم لوړې دي.
دوی له حکومتي مسوولینو غوښتنه کوي،چې د لوړو بیو په کنټرول کې دې خپلې هڅې ګړندۍ کړي.
کندهار کې یو تن اوسېدونکی وايي:« له یوې خوا روژه ده، اختر راروان دی، قیمتونه لوړ شوي دي، له بلې خوا بېکاري ده. زموږ غوښتنه دا ده،چې حکومتي مسوولین دې دا ستونزه حل کړي. ډالر چې کله لوړ شو، توکې هم ورسره قیمت شول، خو اوس چې ډالر راټيټ شوی، د خوراکي توکو بیې نه دي راټيټ شوي.»
خو سوداګر بیا لوړ ګمرکي محصلات د خوراکي توکو د لوړو بیو اصلي لامل ګڼي.
دوی وايي، له بهره پر راوړل شویو توکو د ګمرک له لورې مالیه لوړه شوې او دوی اړ شوي،چې د خوراکي توکو بیې ورسره لوړې کړي.
سوداګر سید محمد وايي:« موږ اړ یو،چې د خوراکي توکو توکو بیې لوړې کړو، ځکه پر موږ د ګمرک مالیه لوړه شوې ده.»
په همدې حال کې د کندهار ښاروالۍ د مارکېټونو تنظیم امر فرید احمد نظري د بیو کنټرول له خپله توانه لوړ ګڼي او وايي، د خوراکي توکو ډېره برخه له بهرنیو هېوادونو راوړل کېږي او د بیو ټاکنه هم د هماغه هېوادونو له لورې شوې ده.
نظري زیاته کړه:« بیې په بهر کې لوړ شوي دي. زموږ ډېری خوراکي توکې له بهره راوړل کېږي، نو سوداګر اړ شوي،چې د خوراکي توکو بیې لوړې کړي.»
دا په داسې حال کې ده،چې په تېرو څو ورځو کې د کندهار ښاروالۍ له لورې یو شمېر هغه شرکتونه او هټۍ د جریمې په توګه وتړل شوې،چې د خوراکي توکو بیې یې لوړ کړې وې.
