په کابل ښار کې د خياطۍ او رخت پلورنې یو شمېر هټۍ وال وايي، وروستي سياسي تحول او ورسره خراب اقتصادي وضعیت يې کاروبارونه خراب کړي دي.
دوی وايي،سره له دې چې کوچنی اختر په رارسېدو دی،خو د دوی هټيو ته د خلکو ورتګ کم رنګه دی.
فرهاد له تېرو لسو کالونو راهيسې خیاطي کوي او له همدې لارې کورنۍ ته نقه پيدا کوي، خو وايي، سږ کال يې کاروبار د تیرو کلونو په شان نه دی او خراب شوی دی.
فرهاد زیاته کړه:« توپیر خو یې ډېر کړی دی، موږ به مخکې ۷ یا ۸ جوړې ګنډلې، اوس پنځه يا څلور ګنډو، له مخکې کالونو یې توپیر ډېری کړی دی. لامل يې دا دی،چې مخکې جنګونه ول، خلکو وظيفې لرلې،معاش يې اخېسته، مامورينو، معلمانو، اوس هم اسلامي امارت واکمن شوی دی،خو مامورین او عکسر له دندو لرې شوي دي.»
د فرهاد په خبره تېرو کلونو کې به يې د ځانګړو ورځو په رانږدې کیدو ګټه زياته او کاروبار ښه و، خو سږکال ښه نه دی.
فرهاد زیاتوي:«موږ به مخکې، له روژې درې وړاندې وړاندې شوکاري شروع کوله، روژې نه مخکې به مو شوکاري کوله،کار به مو زيات کاوه، اوس دا دی د روژې لسمه ده، خو ايله د شپې تر اتو يا نهو بجو پورې کار کوو.»
خیاطان او رخت پلورونکي وايي،د خلکو اقتصاد کمزوری شوی او همدا لامل دی،چې ډېری خلک اوس کالي نه جوړوي.
کابل کې یو تن خياط وايي:« دلته خو وضعیت بيخي خراب دی،. وړاندې به مو کاريګرو ته زيات کارونه ورکول، پنځه جوړې،شپږ جوړې ورکولې. سږ کال موږ کاریګرو ته کار هم نه شو ورکولای، يانې که کار هم ورکړو، ورځ کې دوه جوړې یا درې جوړې ورکړو.
