Skip to content
د پکتیا مرکز ګردیز ښار یو شمیر اوسېدونکي نیوکه کوي،چې د روژې مبارکې میاشتې په رارسیدو سره په بازارونو کې د خوراکي او نورو توکو بیې د تېر پرتله خورا لوړې شوي دي.
دوی اوړه،غوړي ، بوره او ځېنې نور خوراکي توکي هغه څه یادوي،چې هټیوالو یې له لامل پرته بیې لوړې کړي او ډېری خلک یې د اخېستلو توان لري .
د پکتیا یو تن اوسېدنکی وايي:« د یوې بورۍ اوړو بیه ۲۳۰۰ ته لوړه شوې. د هرڅه بیې یو په لسه پورته شوي،خو راښکته کېږي نه.»
د پکتیا یو بل اوسېدنکی بیا وايي:« د توکو بیې یو په دوه پورته شوي دي،چې روژه راشي، د توکو بیې نورې هم پورته کېږي او د هر شي بیې اوج ته رسیدلي دي.»
د پکتیا یو شمېر نور اوسېدونکي بیا وايي، له یوې خوا کارونه نه شته او له بل لوري د توکو بیې دومره لوړې شوي،چې دوی یې د را نیولو توان نه لري.
بلال سهار وختي د روزګار په هېله له کوره راوتلی خو وایي، ورځ تر نیمایي رسیدلی، خو په خبره یې تر اوسه پورې یې کار نه دی موندلی.
بلال زیاته کړه:« په دې روژه کې چې موږ ته کوم ډول سخت کار وي، کوو یې، د دې لپاره یې کوو، چې شپې ته خپلو اولادونو ته نفقه پیدا کړو. که موږ تږي يو،که وږي يو،که هر څه شی راباندې کېږي،موږ اړ یو،چې وې کړو. خو کار نه پیدا کېږي.»
اخوا د ګردیز ښاروال شریف الهام هم مني،چې د روژې په را رسیدو سره هټیوالو د ځینو توکو بیې لوړي کړي خو په خبره یې، د کنټرول لپاره یې یوې کمیټې په کار پیل کړی دی.
الهام زیاته کړه:« رښتا هم د روژې له راتلو سره یو شمېر هټۍ والو بیې لوړې کړي دي. د دې لپاره مو په قضایي جلسه کې یو کمیسیون ټاکلی دی، د ولایت مقام په رهبرۍ کې،چې هغوی صنعت او تجارت ته اطاق تجارت ته محکمې ریاست ته او ښاروالۍ ته، دوی پر ګډه باندې کار کوي او انشاء الله کنټرول کوي یې.»
په وروستیو میاشتو کې د بېلابېلو لاملونو له امله په بازارونو کې د خوراکي او نورو توکو بیې لوړې شوي دي،خو د روژې په پیل سره له لامل پرته د ځینو توکو په بیو کې لوړوالی راغلی دی او خلک یې د کنټرول غوښتنه کوي.
