د اقتصادي ځان بسیاینې د هڅو په دوام، دا ځل بلخ ولایت کې د نفتي سیمو اکتشاف.
د بلخ ولایت حیرتان دو راهي د افغان- تاجیک نفتي حوزه کې د محمد جان ډګر نفتي بلاک کې تازه د یوه ازبېکستاني شرکت له خوا د نفتو سروې او څېړنې چارې پیل شوې.
د کانونو او پټرولیم وزارت چارواکي وایي، د بلخ ولایت په افغان- تاجیک نفتي ساحه کې د محمدجان ډګر، احمد اباد او شمر نفتي بلاکونه دي چې ټولټال څه باندې ۷۶۰۰ کیلومټره مربع مساحت لري.
په دې درېیو ساحو کې به زر کیلومټره د نفتو او ګازو موندلو په موخه د راتلونکي یوه کال په موده کې د سروې او اکتشاف چارې ترسره شي.
د کانونو او پټرولیم وزارت د هایدروکاربن سروې چارو رییس عبدالخلیل وايي: « د احمداباد بلاک چې شاوخوا ۱۸۵۵ کیلومټره مربع مساحت لري؛ محمد جان ډګر بلاک چې ۳ زره ۶۰۸ کیلومټره مربع مساحت لري او شمر بلاک چې ۲ زره ۱۵۴ کیلومټره مربع مساحت لری. د درې واړو بلاکونو ټول مساحت ۷ زره ۶۱۷ کیلومټره مربع کېږي.»
په همدې حال کې د ازبېکستان قراردادي شرکت مسوولین وایي، له افغان چارواکو سره د شوي هوکړه لیک له مخې به د دوه اړخیزې همکارۍ په ترڅ کې د نفتي ساحو له سروې سربېره، د جیوفزیکي فعالیتونو په پلي کولو، د تخنیکي مهارتونو لېږدولو، د تېلو او ګازو د سرچینو استخراج او ځایي خلکو ته د کاري فرصتونو په برابرولو هم کار وکړي.
د ازبېکستان قراردادي شرکت مسوول خیت بای امانوف وايي: « ازبېکستان چمتو دی چې افغانستان کې د اقتصاد پیاوړتیا برخه کې لازیاته همکاري وکړي. دا چې نن د افغان- تاجیک نفتي حوزې زر کلیومټره ساحې سروې او څېړنې پرانسته کېږي، د دواړو هیوادونو د نېکو روابطو، ښه ګاونډي توب یوه بېلګه یې بللی شو. زموږ دا همکاري به د دواړو هېوادونو ترمنځ اړیکې لا پراخې کړي.»
بله خوا، د اسلامي امارت چارواکي د افغانستان او ازبېکستان ترمنځ د دوه اړخیزو اړیکو پر ټینګښت ټینګار کوي او په بېلابېلو اقتصادي برخو کې د همکاریو د پراختیا ډاډ ورکوي.
د کانونو او پټرولیم وزارت ویاند همایون افغان وايي: « په افغانستان کې رامنځته شوی فرصت، امنیت، بډایه زېرمې او د اسلامي امارت اقتصاد محور پالیسي ټولو هېوادونو، شرکتونو او پانګوالو ته ښه فرصت دی. موږ ټولو ته بلنه ورکوو چې راشي او د افغانستان په کانونو کې پانګونه وکړي.»
د بلخ والي مرستیال نورالهادي ابو ادریس وايي: « تاسو خپل کار په پوره اطمینان او ډاډ سره مخته یوسی. ستاسو امنیت او اړتیاوې به پوره شي.»
افغان– تاجیک حوزه یو پراخ جیولوژیکي جوړښت دی چې د څو شمالي ولایتونو ترمنځ غځېدلې ده.
د کانونو او پټرولیم وزارت د معلوماتو له مخې، د افغان- تاجیک نفتي حوزې مساحت شاوخوا ۵۷ زره کیلومټره مربع دی او ۱۱ نفتي بلاکونه لري چې کولی شي د هېواد په اقتصادي پراختیا کې مهم رول ولوبوي.
