د ریاست الوزرا اقتصادي معاونیت د ملي تدارکاتو کمیسیون، د یو شمېر ولایتونو لپاره له ۲۰ زیاتې پراختیايي پروژې منظورې کړې.
د اسلامي امارت مرستیال ویاند وايي، دا پروژې چې ټولیز ارزښت یې دوه نیم میلیارده افغانۍ کېږي، د سې شنبې په ورځ د ریاست لوزرا اقتصادي مرستیال ملا عبدالغني برادر په مشرۍ د ملي تدارکاتو کمیسیون له خوا منظورې شوې دي.
حمدالله فطرت زیاتوي، د ملي تدارکاتو کمیسیون په نوبتي غونډه کې د ۳۳ پروژو وړاندیز شوی و چې له ډلې یې له ۲۰ زیاتې پروژې منظورې او په پاتې نورو کې یو لړ بدلونونه راوستل شول.
د اسلامي امارت مرستیال ویاند حمدالله فطرت وايي: «په منظور شویو پروژو کې د کابل، هرات، ننګرهار، بلخ او خوست ولایتونو د هوايي ډګرونو د ګمرکونو لپاره د سکنرونو اخستل، له ګردېز څخه تر خوست پورې د عمومي سړک ترمیم، د غزني او فراه ولایتونو د امنیه قوماندانیو لپاره د ودانیو جوړول، د سرپل ولایت د سلطان ابراهیم بند د اوبو لګولو د تفصیلي ډیزاین او امکان سنجۍ مطالعات، د سرپل ولایت د سانچارک، سوزما قلعه او ګوسفندي ولسوالیو ته د برېښنا رسول، د کندوز ولایت په قلعه ذال، د هلمند په ګرشک، د پروان په شینوارو، د فراه په پرچمن، د خوست په لکڼو، د تخار په ورسج، د کاپیسا په اله سای، د کابل په شکردرې او د بدخشان ولایت په درایم ولسوالیو کې د عمومي روغتونونو جوړول شامل دي.»
فطرت دغه راز زیاتوي، د ټولو منظور شویو پروژو لګښت د اسلامي امارت له داخلي بودیجې ورکول کېږي.
په ورته وخت کې د چارو یوشمېر شنونکي وایي، دا ډول پروژې د هېواد په اقتصادي پرمختګ کې اساسي رول لري او له افغان پانګه والو غواړي چې له حکومت سره په ګډه د هېواد په اقتصادي پرمختګ کې ونډه واخلي.
د اقتصادي چارو شنونکی یونس ځدراڼ وايي: « د حکومت له خوا پر سترو پروژو پانګونه د هېواد پر اقتصادي وضعیت مثبت اغېز لري. په ځانګړې توګه د بې کارۍ کچې په ټیټولو کې چې زموږ ډېری هېوادوال ورسره مخامخ دي او له همدې امله بهر ته سفرونه کوي، د دغو سفرونو پرمهال له ګڼو ستونزو سره مخامخ کېږي او حتا ژوند له لاسه ورکوي، د دغو بې کاریو په کچه ټیټولو او دغه راز د افغانستان په اقتصادي پياوړتیا کې مهم رول لوبوي.»
له دې سره همهاله، د چارو یوشمېر نور شنونکي بیا وايي، د دا ډول پروژو پلي کول او په ټول ګټو پروژو کې د حکومت له لوري پانګونه کول، د کورنیو د اقتصادي پرمختګ ترڅنګ، په هېواد کې د کاري فرصتونو رامنځته کولو ته هم زمینه برابروي.
د اقتصادي چارو شنونکی عبدالجبار ساپی وايي: « دا ډېرې مهمې زېربنايي پروژې دي او د افغانستان په اقتصادي پرمختګ، د خلکو لپاره د کاري زمینو برابرولو او نورو برخو کې مثبت اغېز لري. بله خبره دا ده چې دغې پروژې د افغانستان له خپلې بودیجې تمویلېږي، یانې دا چې د افغانستان خپلې پیسې د افغانستان پر رغولو لګول کېږي، نو له همدې امله به د خلکو په ژوند کې مثبت بدلون راولي.»
دا په داسې حال کې ده چې له دې وړاندې په هېواد کې د اقتصادي پرمختګ په موخه ځینې نورې پروژې هم عملي شوې چې یوه له هغو یې د نغلو ۱۰ مېګاواټه لمریزې برېښنا پروژه وه چې شاوخوا ۲۰ زره کورنیو ته برېښنا برابروي.
