د تسبېح جوړونې هنر د هرات ولایت یو له پخوانیو هنرونو دی چې له ډېرې مودې راهیسې هنرمندان په دې برخه کې کار کولو سره د خپل ژوند چارې پر مخ وړي.
په هرات ولایت کې په لاس د تسبېح جوړولو یوه کارځای کې هره میاشت شاوخوا ۱۰۰۰ جوړې لاسي تسبېح جوړېږي او سعودي عربستان، مصر، روسیې او یو شمېر نورو عربي هېوادونو ته صادرېږي.
د کارځای مسوولان وایي، د لوړ کیفیت، ځانګړې مینیاتورۍ جوړښت، دودیز ډیزاین او د ښه موادو کارولو له امله یې تولیداتو په بهرنیو هېوادونو کې ښه بازار موندلی.
د تسبېح جوړولو کارځای مالک واحد خان عرب وايي: « زموږ د کار ډېر ظرافت دا دی چې په لاس جوړېږي، ځانګړې میناتوري پرې کښل کېږي او ډېر وخت پرې کار کوو. موږ اوس ښه ډېر پېرودونکي او تر ۱۰ زره جوړو سفارش لرو، خو دا چې ډېر وخت نیسي، نه شو کولی له یوزر جوړو زیاتې تسبېح جوړې کړو. زموږ د تولید کړیو تسبېحو نیمايي مدینې منورې ښار ته استول کېږي او پاتې نورې څو هېوادونو او د افغانستان ولایتونو ته استول کېږي.»
په دې کارځای کې د تسبېح جوړولو ترڅنګ د ځوانانو د روزلو لپاره هم کار کېږي او اوس مهال په کې ۱۱ ځوانان د تسبېح جوړولو هنر په زده کړه بوخت دي.
دوی وایي، که لازمې اسانتیاوې ورته برابرې شي، کولی شي دا هنر نورو ته هم ورزده کړي.
تسبېح جوړونکی محمد ایوب وايي: « موږ د غرنۍ خرما له زڼو تسبېح جوړوو، بیا پرې ځانګړې میناتوري پلې کولو. همدارنګه شاه مقصودي، ګردې، انګوري او د اوښکو په شان ډیزاینونه لرو. زموږ د ځانګړې میناتورۍ لرونکې تسبېح خاص مینه وال لري.»
له بلې خوا، د هرات د اطلاعاتو او فرهنګ ریاست مسوولین وایي، د هرات د لاسي او دودیز صنایعو له ډلې، تسبېح د دې ولایت مهم فرهنګي تولید دی او بهر ته یې لېږد د افغانستان د فرهنګ او هنر د معرفي کولو لپاره ځانګړی ارزښت لري.
د هرات د اطلاعاتو او فرهنګ ریاست د فرهنګ او هنر آمر حمیدالله غیاثي وايي: « د دې برخې تولیدات لوېديځو او عربي هېوادونو ته صادرېږي. د هرات ولایت محلي اداره به له هنرمندانو څخه خپل ملاتړ ته ادامه ورکړي.»
دا مهال هرات کې ۶ ډوله تسبېح جوړېږي چې پرمخ یې د سرو او سپینو زرو، مسو او المونیم میناتوري کښل کېږي.
