په هرات کې ځايي چارواکي وايي، د روان لمریز کال په تېرو نهو میاشتو کې بهرنیو هېوادونو ته د صادراتو کچه ۱۶۹میلیونه ۳۳۵ زره ډالرو ته رسیږي چې دا په سلو کې ۳۵ سلنه زیاتوالی ښیي.
په دې ولایت کې د سوداګرۍ او پانګونې چارواکي وايي، د مجموعي صادراتو له ډلې یې د ۱۶ میلیونه ۳۰۰ زره امریکايي ډالرو په ارزښت، یوازې تازه مېوې صادرې کړې دي.
د هرات سوداګرۍ او پانکونې خونې اجراییه آمر محمد یوسف امین وايي: « سږ کال له هرات ولایت څخه شوي صادرات شاوخوا ۱۶۹ زره ټنه وو چې پولي ارزښت یې ۱۶۹ میلیونه ۳۳۵ زره امریکايي ډالر کېږي. دغه صادرات ګاونډیو هېوادونو، آسیايي، اروپايي او امریکايي هېوادونو ته شوي. یوازې د ۱۶ میلیونه او ۳۰۰ زرو ډالرو په ارزښت تازه مېوه صادره شوې.»
په ورته وخت کې ځايي سوداګر بیا وايي، په ګمرکونو کې د اسانتیاو رامنځته کول او له بهرنیو هېوادونو سره د اسلامي امارت د اقتصادي اړیکو پیاوړتیا په صادراتو کې د دې زیاتوالي اصلي لاملونه دي.
دوی ټینګار کوي چې په دې برخه کې دې نورې هلې ځلې هم وشي.
د هرات سوداګرۍ او پانګونې خونې رییس محمد یونس قاضي زاده وايي: « په ګمرکونو کې زموږ ستونزې هوارې شوې دي او هغه اسانتیاوې چې محلي ادارو او حکومت صنعتګارانو ته برابرې کړې دي، له صنعتګرو څخه د ملاتړ څرګندونه کوي او ښيي چې تجارت مخ پر ودې روان دی.»
سوداګر نوید احمد وفا وايي: « موږ اوس داسې ځای ته رسېدلي یو چې د افغانستان تولید کړي توکي نورو هېوادونو ته صادرېږي. دا څرګندوي چې زموږ تولید کړي توکي له ښه کیفیت برخمن دي او ښه بازار لري.»
تر ډېره دا باور موجود دی چې بهرنیو هېوادونو ته د صادراتو په زیاتوالي سره ملي عواید زیاتېږي چې ورسره خلکو ته د روزګار زمینې هم برابرېږي او په ټوله کې د هېواد د اقتصادي ودې لپاره امکانات برابروي.
د اقتصادي چارو کارپوه بهاالدین رحیمي وايي: « هرڅومره چې صادرات ډېر وي، د کار موندلو زمینې هم ډېرېږي او دېته لاره هوارېږي چې له بهر څخه پيسې هېواد ته راشي. موږ مصرفي مواد له بهر څخه راوړل او په بدل کې یې ډالر زموږ له هېواد څخه وتل، خو کله چې موږ صادروونکي اوسو، پانګه هم له بهر څخه افغانستان ته راځي.»
بهرنیو هېوادونو ته په صادراتو کې له دې زیاتولي سربېره، په هرات ولایت کې ځايي چارواکي له سوداګرو څخه د خپل ملاتړ د دوام ډاډ ورکوي او هڅه کوي چې دوی ته د لازمو اسانتیاو په برابرولو سره د صادراتو کچه نوره هم لوړه کړي.
د هرات والي ویاند محمد یوسف سعیدي وايي: « د هرات محلي اداره هڅه کوي چې د تازه مېوو د صادراتو لپاره د لا ډېرو اسانتیاوو په برابرولو سره، دغه ارقام نور هم لوړ کړي.»
د هرات د ځايي چارواکو د معلوماتو له مخې، له دې ولایت څخه بهرنیو هېوادونو ته په صادردونکو توکو کې وچه او تازه مېوه، لاسي صنایع،غالۍ، کرنیز محصولات او کاني توکي شامل دي. د چارواکو د معلوماتو له مخې، دا صادرات څه باندې شلو اسیايي، اروپايي او امریکايي هېوادونو ته صادریږي.
