حکومت په تېره یوه میاشت کې د ترسره شویو اقتصادي او سیاسي فعاليتونو اړوند راپور خپور کړی.
مسوولان وايي، په دې موده کې د سوداګریزو اړیکو د رغونې او پراختیا لپاره یو شمېر ګاونډیو هېوادونو ته د چارواکو پر سفرونو سربېره، د شاوخوا ۱۶.۴میلیارده افغانیو په ارزښت بېلابېلو ولایتونو کې سلګونه پراختیایي او عامالمنفعه پروژو پر قراردادونو سربېره، يو شمېر پروژې تطبیق شوې او ځینې نور هم تر کار لاندې دي.
د حکومت اړوند الاماره وېبپاڼې په راپور کې راغلي: « د تېرې میاشتې په لړ کې د ملي تدارکاتو کمیسیون له لوري د ۱.۵ میلیارده افغانیو په ارزښت ۱۱ رغنیزې او زېربنایي پروژې منظورې شوې دي. په ۴ بېلابېلو ولایتونو کې د ۲.۳۴۱ میلیارده افغانیو په ارزښت شاوخوا ۲۰۰ بېلابېلې پراختیایي پروژې پیل شوې دي. همدا راز، له هند څخه د درملو واردولو په برخه کې د ۱۰۰ میلیون ډالرو په ارزښت د تړونونو لاسلیکولو ترڅنګ، د نږدې ۱۰.۵ میلیون ډالرو په ارزښت د قشقري څاه ګانو نفت پلورل شوي دي.»
راپور کې دغه راز د بشپړو شویو پروژو ټول ارزښت شاوخوا ۴.۶ میلیارده او تر کار لاندې یا قرارداد شویو هغو ارزښت نیږدې ۱۱.۸ میلیارده افغانۍ ښودلی.
چارواکي بیا د تېر په څېر د اقتصاد پرمختګ، رغنیزو پروژو، پراختیايي چارو او کارموندنې فرصتونو رامنځته کولو لپاره خپلې ژمنې تازه کوي. دوی د افغانستان د اقتصادي ودې په اړه د نړیوال بانک وروستی خپور شوی راپور د خپلو هڅو ثبوت ګڼي.
د اقتصاد وزارت مسلکي معین عبداللطیف نظري وايي: « نړیوال بانک هم د هېواد اقتصادي پرمختګ تایید کړی او وايي، اقتصادي وده ډېره شوې، د انفلاسیون(تورم) کچه ټیټه شوې او د افغانستان د صادراتو کچه لوړه شوې ده. نړیوال باند افغانستان کې د پراختیايي پروژو پلي کول هم لاسته ر اوړنه ګڼلې ده.»
د اقتصادي چارو شنونکي که څه هم د زېربنایي او رغنیزو پروژو د تطبیق روانې لړۍ ته په پام د اقتصادي ځان بسیاینې لپاره د حکومت هڅې ستایي، خو کافي یې نه بولي.
د اقتصادي چارو شنونکی یونس ځدراڼ وايي: « سره له دې چې پاکستان سره د سوداګرۍ لارې تړلې دي، بیا هم افغانستان له اقتصادي پلوه په تدریجي ډول مخ پر وده او بریالیتوب روان دی. دا د افغانستان د حکومت او سوداګرو هڅې او هوډ ښيي چې ښه پایله یې هم ورکړې.»
د نړیوال بانک وروستی راپور چې روانه میاشت خپور شو، په کې په ۲۰۲۵زېږدیز کال کې د افغانستان اقتصادي وضعیت د ودې په حال کې بللی و. په راپور کې ویل شوي، د ناخالص کورني تولید(جيډيپي) کچه د تېر کال پرتله شاوخوا ۴.۳ سلنه لوړه شوې ده.
