په داسې حال کې چې په هرات کې د فرشونو او ماشیني غالیو(غالیو) تولیدونکي د برېښنا او د خامو موادو له کمښت شکایت کوي، خو بیا هم دا صنعت بریالی شوی چې د ماشیني فرشونو او غالیو له پلوه د هېواد ۴۵ سلنه اړتیاوې پوره کړي.
هرات کې ځایي مسوولان وايي، اوس مهال د دې ولايت په صنعتي ښارګوټي کې د فرشونو او ماشيني غالیو د توليد۲۰ فابريکې فعالیت لري چې ۱۴ هغه یې فرشونه او ۶ نورې ماشیني غالۍ تولیدوي.
د هرات والي ویاند محمد یوسف سعیدي وايي: « د هرات محلي ادارې تل د صنعت د ودې لپاره هر اړخیز ملاتړ کړی او په ټولو برخو کې د غوره پرمختګونو لیدونکي یو. د فرش او غالیو د تولید په برخه کې هم له ۲۰ ډېرې کارخونې فعالیت لري او د هېواد شاوخوا ۴۵ سلنه اړتیاوې پوره کوي.»
د هرات صنایعو او کانونو خونې رییس عبدالناصر امین وايي: « موږ د غالیو د تولید ۶ لویې کارخونې لرو؛ همدارنګه د فرش د تولیدولو ۱۴ کارخونې لرو چې ټولې یې ۲۰ کارخونې کېږي. یوازې د غالیو د تولید په برخه کې ۴۰ میلیون ډالره پانګونه شوې.»
په هرات کې د فرشنونو او ماشیني غالیو د تولید په اړه دا خبرې داسې مهال کیږي چې د دغو کارخونو مالکان بیا د برېښنا او اومو موادو له کمښت شکایت کوي.
د دې ترڅنګ، د فرش او غالیو صنعتکاران د خپلو تولیداتو په اړه یوه بله مهمه ستونزه له بهرنیو هېوادونو څخه د ورته توکو واردات ښیي.
د دوی په خبره، که یادې ستونزې هواری شي، نو دوی ډاډه دي چې د کارخونو تولیداتو وړتیا به یې څو برابره لوړه شي.
صنعتکار مکمل شهیدي وايي: « زموږ د کار پر وړاندې لوی خنډ له نورو هېوادونو څخه راتلونکي مشابه جنسونه دي. موږ په دې اړه له امارت سره خبرې کړې او تر یوه حده یې کار هم کړی، خو زموږ غوښتنه دا ده چې په مشابه جنسونو یا تعرفه لوړه شي او یا یې هم واردات بند شي.»
صنعتکار امین الله نورزی وايي: « ستونزې شته، د مثال په توګه؛ کله چې یو موټر مواد راځي له ۲۰ تر ۲۵ ورځو وخت نیسي او بله دا چې افغانستان کې هم خام مواد نه لرو، ټول له بهر څخه راځي. دولت باید ټرانسپورټي ستونزې هوارې کړي.»
د یادو کارخونو مالکان وايي، یوازې د غالیو شپږو کارخونو کې څه باندې۴۰ میلیون ډالره پانګونه شوې او له دې سره زیات شمېر کسانو ته په کې د کار زمینه برابره شوې ده.
دغو کارخونو کې په کار بوخت کسان بیا له نورو پانګوالو هم غواړي چې خپلې پانګې هېواد ته راولېږدوي او د بې روزګارۍ د ستونزې په هوارولو کې برخه واخلي.
د غالیو تولیدوونکې فابریکې کارګر حبیب الله وايي: « زه خوښ یم چې خپل هېواد کې کار کوم. زه به لا ډېر خوښ شم چې زموږ هېواد کې دا ډول کارونه نور هم ډېر شي او د پردیو له احتیاج خلاص شوو.»
یو بل کارګر نثار احمد وايي: « که دا سوداګر خلکو ته د کار زمینه برابره کړي، خلک به ایران، پاکستان او غربي هېوادونو ته د تګ هڅه نه کوي.»
د پانګونې پراختیا او کاري فرصتونو رامنځته کولو غوښتنه داسې مهال کیږي چې په اوسنیو شرایطو کې ډېری افغانان د بې روزګارۍ له امله په غیر قانوني ډول ګاونډیو هېوادونو ته د تګ هڅه کوي او ډېر کله له ناوړه پېښو سره مخامخ کېږي.
تر ټولو وروستۍ پیښه کې د افغانستان او ایران پر ګډه پوله څلورو کسانو چې په غیرقانوني توګه یې ایران ته د اوښتو هڅه کول، د سړې هوا له امله ژوند بایللی.
