مزار شریف ته له حیرتان ښارګوټي را انتقالېدونکي نفتي توکو لپاره د یوه ځانګړي سوداګریز مارکېټ جوړېدو چارې پیل شوې.
چارواکي وايي، د نفتي توکو پخوانی بازار اوس له حیرتان بندر څخه مزارشریف ښار ته را لېږدول شوی او لپاره یې د یوه ځانګړي مارکېټ جوړولو ته ۱۵ میلیونه امریکايي ډالر ځانګړي شوي چې کارونه به یې د خصوصي سکټور له خوا پر مخ یوړل شي.
د شمال زون نفتي توکو اتحادیې مسوولین، د دې ګام موخه د نفتي توکو زېرمه کول، د پېر او پلور لپاره معیاري اسانتیاوې برابرول او سوداګرو ته د سهولتونو رامنځته کول بولي.
د شمال زون نفتي توکو اتحادیې مسوول، مومن ضیايي وايي: « دلته ۴۶۶ تنه سوداګرۍ ونډه او حضور لري او د دې مارکېټ پر جوړولو ۱۵ میلیون ډالره پانګونه کوي. دا چې حیرتان بندر ته هره ورځ د سوداګرو تګ راتګ ستونزمن و؛ ځکه چې ۸۰ کیلومټره لاره ده؛ نو غوره ورګڼل شوه چې دا مارکېټ جوړ شي. دلته به هره ورځ په ۱۱ بجو د نفتي توکو ورځني نرخونه ټاکل کېږي.»
په ورته مهال، د نفتي توکو سوداګر له حیرتان بندر څخه مزار شریف ښار ته د نفتي موادو بازار له انتقال هرکلی کوي او له اقتصادي پلوه یې ګټور بولي.
د دوی په خبره، تر دې وروسته به یې لګښتونه راکم، د توکو وېش به چټک او د خلکو لپاره به د نفتي موادو ترلاسه کول اسانه شي.
د نفتي توکو سوداګر حیاتالله امیري وايي: « کله چې دا بازار په حیرتان بندر کې و، سوداګرو رسیدګي نه شو کولی؛ اوس ډېر خوښ یو چې د دې لپاره دلته مزار کې مارکېټ جوړېږي. دا ډېر ښه اقدام دی او د ټولو په ګټه دی.»
سوداګر اسدالله اسدي وايي: « دغه ګام د تېلو د کیفیت لوړېدو، د نرخونو له لوړېدو او احتکار څخه د مخنیوي په برخه کې مهم رول لوبولی شي. دغه بازار وړاندې له دې په حیرتان بندر کې و، خو لارې لرې والي له امله دا پرېکړه وشوه چې دلته مزار شریف کې جوړ شي.»
بل پلو، د افغانستان د سوداګرۍ او پانګونې خونې مسوولین وايي، د دې مارکېټ انتقال به نه یوازې د نفتي توکو بازارته ثبات ورکړي بلکې د کورنیو او بهرنیو پانګوالو لپاره به هم اسانتیاوې رامنځته کړي.
د دوی په خبره، اسلامي امارت هڅه کوي بهر کې مېشت افغان سوداګر وهڅوي چې په خپل هېواد کې پانګونه وکړي.
د سوداګرۍ او پانګونې خونې رییس، سید کریم هاشمي وايي: « اسلامي امارت تاجرانو ته ډېر امکانات برابر کړي او درناوی یې کوي. دغه امکانات او شرایط له لومړي معاون څخه نیولې تر ولایتونو او بنادرو پورې هرځای برابر شوي دي.»
د بلخ ولایت سوداګرۍ او پانګونې خونې سرپرست هارون رشید وايي: « د دې مارکېټ یا مرکز جوړېدو به ډېر سهولتونه رامنځته کړي. په تجارتي معاملاتو کې له شفافیت نیولې د نرخونو او کیفیت تر کنټرول پورې به هرڅه په کې ترسره کېږي. دغه ځای به ملت او حکومت ته د ځواب ورکولو یوه منبع هم وي.»
د نفتي توکو د پېر او پلور دا مارکېټ د سوداګرۍ او پانګونې خونې تر چتر لاندې د شمال زون د نفتي موادو اتحادیې اړوند، یو مهم واحد بلل کېږي. په دې مارکېټ کې به د نفتي توکو لپاره ځانګړې او واحدې بیې ټاکل کېږي.
