هرات کې دا مهال د تارو او بوجیو د تولید ۸ کارخونې فعالیت لري. یوه له دغو کارخونو د څه باندي ۲۰ میلیون ډالرو پانګونې سره په ورځني ډول ۲۵ تر۳۰ ټنه بوجۍ تولید او داخلي بازار ته وړاندي کوي، خو له بهره د ورته توکو وارداتو یې بازار ټکنی کړی.
صنعتکار محمد نعیم چمتو وايي: « موږ اوس مهال افغانستان کې د ډول ډول پلاسټیکي بوجیو د تولید له پلوه د ځان بسیاینې پر خوا روان یو. له اسلامي امارت غوښتنه کوم چې د مشابه توکو له وارداتو مخه ونیسي یا پرې تعرفې لوړې کړي، ترڅو موږ وکولی شو د تولید په زیاتولو سره لا ډېر خلکو ته د کار زمینه برابره کړو.»
یاده کارخونه کې څه باندي ۳۰۰ کسانو ته د کار زمینه هم برابره شوې. دلته په کار بوخت کسان هېواد کې د کورنيو تولیداتو ودې او بېروزګارۍ ختمولو لپاره د پانګونې پر پراختیا ټینګار کوي.
د بوجیو تولیدي شرکت یو تن مسوول عبدالحق زماني وايي: « له ۳۰۰ تر ۳۵۰ تنو کاري پرسونل په لرلو سره، له ۲۵ تر ۳۰ ټنو ورځنی تولید لرو.»
کارګر نذیر احمد وايي: « د خدای شکر دی چې په خپل هېواد کې د کار زمینه راته برابره ده. اوس اړتیا نه شته چې کار پسې بل هېواد ته لاړ شو، اوس شکر دی امنیت هم شته. زه له نورو شتمنو کسانو هم غوښتنه کوم چې راشي او خپل هېواد کې پانګونه وکړي.»
د کارخونې یوبل کارګر فریدون وايي: « له ټولو تجارانو غواړم چې هېواد ته راشي، دغسې شرکتونه جوړ کړي، ترڅو مسلمانانو ته په کې د کار فرصت برابر شي.»
بله خوا، د هرات ځایي مسوولان وایي، د بوجیو او تارو د تولید په برخه کې د څه باندي ۶۵ میلیون ډالرو په ارزښت جوړې شوې ۸ کارخونې په ورځني ډول سل ټنه بوجۍ تولیدوي چې کولی شي د بازار اړتیا پوره کړي.
د هرات والي ویاند محمد یوسف سعیدي وايي: « د افغانستان اسلامي امارت او د هرات ولایت د محلي ادارې له خوا په هرات کې د صنعت د ودې لپاره شویو هلو ځلو په پایله کې، ګڼ پرمختګونه لرو او د پلاسټیکي بوجیو د تولید په ګډون په ټولو برخو کې ښه فعالیتونه شوي. په دې برخه کې اوسمهال ۶۵ میلیون ډالره پانګونه شوې او نږدې راتلونکي کې به دا کچه ۱۰۰ میلیون ډالرو ته لوړه شي.»
دا په داسې حال کې ده چې د هرات یو شمېر سمه ییز مسوولان په نږدې راتلونکي کې د بوجیو تولید لپاره د شاوخوا ۱۰۰ میلیون ډالرو پانګونې خبر ورکوي او وايي، له دې سره به یاده برخه کې په بشپړ ډول د بازارونو اړتیا پوره شي.
