په کابل کې د امام ابوحنيفه ملي او نړیوال نندراتون له ۷ ورځني فعالیت وروسته پای ته ورسېد.
د سوداګرۍ او پانګونې خونې چارواکي دا نندارتون له دې امله له لاسته راوړنو ډک بولي چې نږدې ۱ میلیون تنو ترې ليدنه کړې او په کې د ۳۵۰ کورنيو او بهرنيو شرکتونو ترمنځ د ۷سوه ميليون ډالرو په ارزښت قراردادونه لاسليک شوي.
د سوداګرۍ او پانګونې خونې د دارالانشاء ریيس محمدولي امیني وايي: « په دې ترتیب، موږ په تېره یوه اوونۍ کې له ۷۰۰ میلیون ډالرو څخه پورته تفاهم لیکونه او قراردادونه لاسلیک کړي دي. دا د افغانستان د اقتصاد او خصوصي سکټور لپاره لویه لاسته راوړنه ده»
نوموړی وايي، د سوداګرو ترمنځ د قراردادونو پرلاسليک سربېره د امام ابوحنيفه په ۷ ورځني نندارتون کې د ۸۰ ميليونه افغانيو په ارزښت توکي هم پلورل شوي چې د تېرو ورته نندارتونونو په پرتله د توکو د خرڅلاو دا انداره خورا زياته ده.
محمد ولي امیني زیاتوي: « سږ کال موږ په دې نندارتون کې تر ۸۰ میلیونه افغانیو پېر او پلور کړی.»
په دې نندارتون کې د خلکو ګڼې ګوڼې له امله سوداګر هم خوښ دي او له همدې امله يې بريالی ګڼي. خو له حکومت غواړي چې د سوداګرو او پانګوالو د لا هڅولو لپاره دې ورته نندارتونونه نور هم جوړ شي.
پانګوال عبدالله مایار وايي: « د دې ډول نندارتونونو یوه ګټه دا ده چې کورني شرکتونه په کې خپل تولیدات خلکو ته ورښيي.»
ضمیر شریفي وايي: « موږ په تېرو اوو ورځو کې ډېرې لاسته راوړنې لرلې. دلته مو د هېڅ شي کمبود نه دی حس کړی او ډېره ګټه مو هم کړې ده.
یاد نندارتون تېره اوونۍ د یکشنبې په ورځ پیل شوی و او په ۸۲۰ غرفو کې يې د متشبثو مېرمنو په ګډون کورنيو او بهرنيو سوداګرو بېلابېل صنعتي توکي نندارې ته اېښي وو.
