کندهار کې د انار په نوم د کورنیو تولیداتو او محصولاتو درې ورځنی نندارتون پیل شو. دا نندارتون د ملګرو ملتونو د کډوالو نړیوال سازمان(آیاواېم) په مالي ملاتړ، د صنعت او سوداګرۍ وزارت او یوه خصوصي شرکت په همکارۍ جوړ شوی چې موخه یې د خصوصي سکټور ملاتړ او وده ده.
د دې نندارتون په ۱۵۰ غرفو کې کورني تولیدات، محصولات او لاسي صنایعې نندارې ته وړاندې شوي دي.
چارواکو پرانیستغونډې ته خبرو کې وویل، اوس په هېواد کې د پانګونې زمینه برابره شوې او له هېواد څخه بهر افغان پانګوال دې خپلې پانګې د افغانستان په بېلابېلو صنعتي برخو کې وکاروي.
هغوی ټینګار وکړ چې د کورنۍ پانګونې په زیاتېدو سره به د کار زمینه پراخه شي او د هېواد اقتصاد به د ځان بسیاینې پر لور حرکت وکړي.
د کندهار صنعتي پارکونو آمر غوثالدین ثاقب وايي: « هغه پانګوال او صنعتکاران چې له هېواد څخه د باندې دي، اوس د دې اراده لري چې راشي او په خپل هېواد کې پانګونه وکړي. زموږ هم له ټولو غوښتنه ده چې د خپل کور[افغانستان] په جوړولو کې ونډه واخلي.»
د یوه خصوصي شرکت مسوول حمزه وهاج وايي: « دا نندارتون د دې لپاره یو فرصت دی چې صنعتکاران، تولیدوونکي، تاجران او پانګوال له یوبل سره وویني، تجربې سره شریکې کړي او په دې سره د ملي ځان بسیاینې لپاره زمینه برابره کړي. د دې نندارتون موخه د کورنیو تولیداتو وده.»
له بلې خوا، صنعتکاران وایي، دا نندارتون یو ښه فرصت دی، ترڅو د کورنیو تولیداتو کیفیت خلکو ته وښيي او د خلکو باور خپل شي.
د کندهار د صنعت او کانونو خونې مسوول سید سرور اماني وايي: « د دې نندارتون موخه د پېرودونکو جذب او خپل مرغوبیت خلکو ته ښودل ده. په ټوله کې موخه دا ده چې بازار موندنه وکړو.»
صنعتکار ابراهیم توخی وايي: « دا ډول نندارتونونه زموږ د داخلي تولیداتو په معرفي کولو کې مهم رول لري. موږ غوښتنه کوو چې په نورو ولایتونو کې هم جوړ شي، ترڅو خلک خپل تولید وپېژني.»
صنعتکاراحسام الدین عبیدي وايي: « له دولت غوښتنه کوم چې د صنعتي ودې په موخه له صنعتکارانو ملاتړ وکړي او دغه راز په خپلو ادارو او پروژو کې له کورنیو تولیداتو ګټه واخلي.»
په همدې حال کې، د کندهار اوسېدونکي هم د نندارتون هرکلی کوي او وایي، تر دې وړاندې له ډېرو کورنیو تولیداتو سره نه وو بلد، خو د دې نندارتون جوړېدو مرسته وکړه چې له خپلو تولیداتو سره وپېژني.
د کندهار اوسېدونکی سمیع الله وايي: « زه د خپلو کورنیو او افغاني تولیداتو د لیدلو لپاره راغلی یم. دا ډول نندارتونونه موږ خپل محصولات معرفي کوي. دا نندارتون ماته راښيي چې د بهرنیو توکو په ځای خپل کورني تولیدات وپېرم.»
د کندهار یو بل اوسېدونکی سلیمان شاه وايي: « زه ډېر خوښ یم چې د خپل هېواد تولیدات وینم. دلته ډېر داسې توکي شته چې ما له دې وړاندې نه وو لیدلي.»
د کندهار اوسېدونکی وايي: « موږ ته د دې ډول نندارتونونو جوړېدل ډېر مهم دي. باید خلک وویني چې زموږ په هېواد کې څه تولیدېږي. زموږ غوښتنه دا ده چې دا ډول نندارتونونه نور هم ډېر شي.»
په نندارتون کې په دې ټینګار وشو چې د دې ډول پروګرامونو دوام او پراختیا کولی شي د کورنیو صنایعو د دوامدارې ودې او د کاري فرصتونو زیاتېدو لامل شي او دغه راز د ملي اقتصاد په پیاوړتیا کې هم رول ولوبوي.
