هلمند کې د پنبې د پروسېس یوې کارخونې له دې وړاندې په ۲۴ ساعتونو کې تر۳۰ ټنو تولید درلود او نږدې ۱۰۰ تنه کارګران په کې په کار بوخت وو، خو اوس یې د برېښنا کمښت او د تېلو لوړې بیې له امله خپل کارونه درولي دي.
د دغو تولیدې فابریکو مسوولین وايي، د کجکي برېښنا کموالي نه یوازې د دوی پر تولیداتو منفي اغېز کړی بلکې لګښتونه یې هم څو برابره زیات شوي او په پایله کې یې دوی اړ شوي چې د خپلو تولیدي فابریکو فعالیت ودروي.
دوی له حکومته غواړي چې د کجکي برېښنا سربېره دې په هلمند کې د لمریزې برېښنا پروژې هم جوړې کړي.
د یوې تولیدي فابریکې مسوول محمد عارف وايي: « که موږ ۲۴ ساعته برېښنا ولرو، له ۱۰۰ تر ۱۵۰ تنو به په کار بوخت وي، خو که برېښنا نه وي، په تېلي ماشینونو موږ ته د کارخونې فعال ساتل هېڅ ګټه نه کوي.»
د تولیدي فابریکې مسوول حضرتالله احمدي وايي: « زموږ برېښنا اوس ډېر کمه ده، پخوا به زموږ برېښنا تقریبا ً ۲۴ ساعته وه، خو اوس یوازې ۳ ساعته برېښنا لرو. دې کمښت زموږ پر کاروبار ډېر منفي اغېز کړی.»
له بلې خوا، لسګونه ځوانان چې په دغو فابریکو کې پر کار بوخت وو، اوس بې کاره شوي دي.
دوی وایي، په هره فابریکه کې له ۴۰ تر ۲۰۰ کسانو کار کاوه، خو د برېښنا د کموالي له امله یوازې څو محدود کارګران په خپلو دندو پاتې دي.
د خان په نوم یو تن کارګر وايي: « د دې کارخونې له ۴۰ تنو کارګرانو څخه یوازې زه پاتې یم. که چېرې برېښنا ولرو، کارخونه به بېرته چالانه شي، کارګران به بېرته راشي او نور به هم پرمختګ وشي.»
د محمد په نوم یو بل کارګر وايي: « موږ پخوا له ۸ تر ۹ ساعتونو کار درلود، خو اوس مو کار کم شوی او ورسره زموږ اجوره هم کمه شوې؛ ځکه برېښنا نه شته او د کارخونې مالک ته ګټه نه کوي.»
د هلمند برېښنا ریاست مسوولین بیا وایي، په کجکې بند کې د اوبو کمښت له امله برېښنا پرې شوې او دا هغه ستونزه ده چې ډېری وخت تکراریږي.
د دوی په خبره، اړوندو ادارو ته یې د ۲۰ مېګاواټه لمریزې برېښنا د جوړېدو طرحه وړاندې کړې او تمه لري چې نږدې راتلونکي کې یې عملي چارې پیل شي.
د هلمند برېښنا رییس هدایتالله محمد وايي: « موږ مرکز ته وړاندیز کړی او غوښتنه مو کړې چې موږ ته د سولري برېښنا ترتیب برابر کړي. دا چې مرکز له ډېرو شرکتونو سره قراردادونه کړي او په دې ترڅ کې موږ ته هم د ۲۰ مېګاواټو لمریزې برېښنا ژمنه راکړل شوې. د دې پروژې د جوړېدو وخت نه دی معلوم، خو موږ هڅه کوو څومره ژر چې کېدای شي، د مرکز لښکرګاه د استونیزو او صنعتي ښارګوټو لپاره د برېښنا غم وخورو. د دې سولري برېښنا کوټ نقشه، ډیزاین او برآورد مرکز ته استول شوي دي.»
هلمند چې خپله برېښنا د کجکي له بند ترلاسه کوي، په همدې تېره اوونۍ کې د اوبو د کمښت له امله له برېښنا بې برخې شو.
د مسوولینو په خبره، تر هغو چې د بند اوبه ډېرې نه شي، د هلمند او کندهار لپاره برېښنا نه شي برابرېدای.
