هرات کې د صنایعو او کانونو خونې مسوولان د دې ولایت صنعتي ښارګوټي کې د کارګرانو په معاشونو کې د دېرش سلنه زیاتوالي خبر ورکوي.
دوی وایي، دا پرېکړه یې د کارګرانو د اقتصادي ستونزو د کمولو او له هغوی څخه د ملاتړ په موخه کړې.
د هرات صنایعو او کانونو خونې رییس عبدالناصر امین وايي: « ځینې شرکتونه ډېر لږ معاش ورکوي، موږ له دې شرکتونو غواړو چې د خپلو کارګرانو معاش له ۳۰ فیصدو هم پورته ور زیات کړي، موږ به پر دغو شرکتونو ډېر فشار راوړو، ترڅو د خپلو کارګرانو معاش لوړ کړي.»
صنعتکار سعد خطیبي وايي: « موږ همدې سبا چمتوالی لرو چې د خپلو کارګرانو معاش لوړ کړو. زه د افغانستان ټولو صنعتکارانو ته وړاندیز کوم چې خپلو کارګرانو ته پاملرنه وکړي، ځکه دوی ته ورکول کېدونکی معاش د هغوی اړتیاوې نه پوره کوي او دا یې پرموږ حق دی چې معاش یې لږترلږه ۳۰ سلنه لوړ کړو، ترڅو آرام ژوند ولري.»
د هرات ځايي چارواکي هم د صنعتکارانو دا پرېکړه ستایي او وایي، د کارګرانو د ژوند ښه کېدل به نه یوازې د کورنیو اقتصادي بوج کم کړي بلکې د کډوالۍ او بېلابېلو ټولنیزو ستونزو کمولو کې هم ګټور تمامېدای شي.
هرات والي شیخ نوراحمد اسلام جار وايي: « صنعت هغه سپېڅلی، پاک او ښایسته شغل دی چې ګڼو خلکو ته د کار کولو زمینه برابروي. په کار زموږ د ځوانانو بوختیا یانې د جرایمو، نشه يي توکو کارونې، غیر قانوني مهاجرتونو او نورو را کمول.»
د هرات صنعت او سوداګرۍ رییس بشیرمحمد سیرت وايي: « زموږ تجارتي او تولیدي شرکتونه که غواړي خپلې ټولنې ته خدمت وکړي، باید د خپلو کارګرانونو معاشونه زیات او د هغوی ستونزې هوارې کړي.»
یو شمېر کارګران د خپلومعاشونو له زیاتوالي هرکلی کوي او وایي، د وروستیو کلونو اقتصادي ستونزو له امله د ورځنیو لګښتونو په پوره کولو کې له ستونزو سره مخ کړي وو، خو د معاشونو زیاتوالی به مرسته وکړي چې د خپلو کورنیو ورځنۍ اړتیا پوره او پر اقتصاد یې مثبت اغېز ولري.
کارګره سکینه محمدي وايي: « دا به ډېر ښه شي، زموږ لګښتونه به پوره کړي، کار ته به تشویق شو او له هر پلوه به کارګرانو ته ګټه ورسوي.»
کارګره حُریه وايي: « دا ډېر ګام دی، په دې سره به موږ له خپلې کورنۍ سره لا ډېره مرسته وکولی شو.»
د هرات صنایعو او کانونو خونې مسوولانو د معلوماتو له مخې، اوسمهال د دې ولایت صنعتي ښارګوټي کې کارګران په اوسط ډول میاشت کې له ۸ تر ۱۲ زرو افغانیو معاش اخلي.
