وروسته له هغه چې د هېواد په ګڼو ولایتونو او په ځانګړي ډول بلخ ولایت کې د تېلو د خراب کیفیت په تړاو د خلکو شکایتونه ډېر شول، د کانونو او پټرولیم وزارت د بې کیفیته نفتي توکو پر وارداتو بندیز ولګاوه.
د کانونو او پټرولیم وزارت ویاند وايي، دغه پرېکړه په کور دننه له شته کانونو څخه د خامو موادو پروسېس زیاتولو او خلکو ته د کاري فرصتونو زمینې برابرولو په موخه شوې.
د کانونو او پټرولیم وزارت ویاند همایون افغان وايي: « د کانونو او پټرولیم وزارت له خوا د کاني موادو د پروسېس او صادراتو پالیسۍ چمتو شوې مسوده د اقتصادي معاونیت له خوا تایید شوه. د دې مسودې موخه په کور دننه د کاني موادو پروسېس ته زمینه برابرول، په دې برخه کې کاري فرصتونه ایجادول، د بهرنۍ پانګه راجلبول او د اړوند وزارتونو ترمنځ د لا ډېر همکارۍ او همغږۍ چمتو کول مقصد دی.»
په ورته مهال، شمال زون کې د نفتي موادو د اتحادیې مسوولین که څه هم له دغې پرېکړې هرکلی کوي خو وايي، په هېواد کې شاوخوا ۱۵ د نفتو د چاڼ کارخونې فعالیت لري چې هره ورځ نږدې څلور زره ټنه خام مواد پروسېس کوي، خو د بندیزونو له امله د تولید بهیر له ستونزو سره مخ شوی.
د مسوولینو په خبره، هېواد کې د نفتي موادو استخراج په کور دننه د شته کارخونو اړتیا نه شي پوره کولی او له اسلامي امارت غواړي چې د آمو دریا نفتي حوزې څخه د نفتو استخراج کچه لوړه کړي.
په شمال زون کې د نفتي موادو اتحادیې مسوول مومین ضيايي وايي: « دغه نوی نورم چې له تېرو ۳ میاشتو راهیسې تطبیق شوی، چاپېریال، د هوا ککړتیا او د ناروغیو مخنیوي ته ګټه رسوي؛ ځکه چې دغه مسایل د بې کیفیته تېلو له امله منځته راتلل.»
همدارنګه، د نفتي موادو د چاڼ کارخونو یو شمېر مسوولین وايي، بندیزونو یې فعالیت ټکنی کړی او په جدي توګه د خامو موادو له کمښت سره مخ شوي.
له بلې خوا یو شمېر پانګوال وايي، اسلامي امارت دې د بې کیفیته نفتي موادو د وارداتو بندیز تر هغې وځنډوي چې دوی خپل تولیدات پرنړیوالو نورمونو برابروي.
د نفتو چاڼ کارخونې مسوول کام بېز صدري وايي: « له دې وړاندې 05 تېل راتلل او بازار ته وړاندې کېدل؛ دا هغه تېل دي چې د کیفیت له پلوه ټیټ ځای لري. د نوي ستندرد له مخې 01 او 02 تېل راځي او په بازار کې تر اتیا سلنو اړتیا پوره کوي. د افغانستان داخلي چاڼ خونې هم کوښښ کوي چې ځانونه له دې نورم او ستندرد سره عیارې کړي.»
د نفتو کارخونې مسوول محمد صادق سمنګاني وايي: « موږ د اسلامي امارت له دې نوي نورم هرکلی کوو، اوسمهال د ښه کیفیت تېل واردېږي او تمه لرو چې د چاپېریال ککړتیا کمه شي. له اسلامي امارت غوښتنه کوو چې د تېلو چاڼ داخلي فابریکو ملاتړ وکړي، د تېلو د تولید کچه لوړه کړي؛ په دې سره به هم خلکو ته د کار زمینه برابره شي او هم به فابریکې خام مواد ولري.»
د معلوماتو له مخې، دا مهال په بلخ او هرات ولایتونو کې د نفتي موادو د چاڼ ١٥ کارخونې فعالیت کوي چې په ورځني توګه شاوخوا څلور زره ټنه خام مواد مصرفوي. له دغه شمېره يې يوازې ٧٠٠ ټنه د سرپل قشقري نفتو له کانونو تر لاسه کوي او پاتې نور له بهرنیو هېوادونو وارېدېږي .
