هرات کې پلاسټیکي توکو تولیدي کارخونې لرونکي له نورو هېوادونو څخه د ورته توکو د وارداتو مخنیوی غواړي.
دوی وایي، په دې برخه کې یې میلیونونه ډالره پانګونه کړې، خو اوس وارداتي توکو په کور دننه د دوی له خوا د تولید شویو توکو ځای نیولی او له دې سره یې د کارخونو فعالیت د درېدو په حال کې دی.
صنعتکار عبدالقدوس وايي: « د کارخونو د ماتېدو لامل دا دی چې له بهرنیو هېوادونو ورته توکي راځي. اوس ایله ۲۰ یا ۲۵ شرکتونه فعال دي.»
صنعتکار عبدالقدیر امیني وايي: « دوه کاله وړاندې مې له ۷۰ تر ۸۰ تنه کارګران درلود، خو اوس ۲۵ تر ۳۰ تنو پورې رسېدلي. د دې لامل دا دی چې ایران څخه پرېمانه توکي راځي او زموږ بیا څوک نه اخلي.»
د دغو کارخونو کارګران هم ورځ تر بلې د تولیداتو سوړ بازار ته په پام اندېښمن دي او خبرداری ورکوي چې که حالت همداسې دوام وکړي، ډېر شمېر کارګران به بي روزګاره شي.
د یوې تولیدي کارخونې کارګر غلام رسول وايي:« موږ په ورځ کې له ۳۰ سلنو زیات کار نه کوو، ځکه چې زموږ تولیدات څوک نه اخلي. له ایران څخه د وارداتي توکو کیفیت ټیټ او قېمت ارزانه دی، خو زموږ کیفیت ښه دی. له دولت غوښتنه کوم چې له ایران څخه د وارداتو مخه ونیسي، ترڅو موږ ته یوه مړۍ ډوډۍ پیدا شي.»
یو بل کارګر خان محمد وايي: « له تېر کال راهیسې زموږ اجوره ورځ تر بلې را ټیټېږي. په دې پیسو او معاش هېڅ نه کېږي.»
ځایي مسوولان په کور دننه د صنعتکارانو او کورنيو تولیداتو د ملاتړ ډاډ ورکوي او زیاتوي چې د ورته توکو د وارداتو مخنیوي په موخه به پر یادو توکو تعرفې لوړې شي.
د هرات والي ویاند محمد یوسف سعیدي وايي: « د هرات محلي اداره د صنعتکارانو د اصلي او قومي ملاتړي په توګه تل هڅه کړي چې د صنعت پر وړاندې پراته خنډونه له منځه یوسي. موږ د هرات ټولو صنعکارانو ته ډاډ ورکوو چې د هرات ولایتي اداره به د صنعت د ودې لپاره خپلو هڅو ته ادامه ورکړي.»
د صنعتکارانو د معلوماتو له مخې، هرات کې د پلاسټیکي توکو د تولید شاوخوا ۵۰ تولیدي کارخونو فعالیت درلود، خو له نورو هېوادونو د ورته بې کیفیته توکو وارداتو زیاتوالي له امله دغه شمېر اوس ۲۵ ته کښته شوی.
