د دوشنبې په ورځ د ایران د سوداګرۍ صنعت او کانونو وزیر په مشرۍ لوړ پوړی اقتصادي او سوداګریز پلاوی کابل ته راغلی.
دغه پلاوی به د دواړو هېوادونو ترمنځ په بېلا بېلو برخو کې د شته ستونزو پرحل خبرې وکړي او همدا راز به د کابل او تهران ترمنځ د دوه اړخیزې سوداګرۍ د پراختیا او ټرانزیټ او ګډې پانګوونې په برخه کې د اسانتیاوو برابرولو په موخه له افغان چارواکو سره لیدنې ولري.
د صنعت او سوداګرۍ وزارت ویاند اخندزاده عبدالسلام جواد وايي: « افغانستان ته د ایران اسلامي جمهوریت د پلاوي سفر موخه د دوه اړخیزې سوداګرۍ پر وړاندې د شته خنډونو پېژندل او د ګډ ټرانزیټ او پانګونې لپاره د اسانتیاوو برابرونه ده.»
په ورته مهال، د ایران د سوداګرۍ، صنعت او کانونو وزیر چې د ایراني پلاوي مشري هم کوي وايي، افغانستان یې ګاونډی او ورور هېواد دی او له افغان چارواکو سره به د لیدنې پرمهال د سوداګریزې راکړه ورکړې پر پراختیا خبرې وکړي.
که څه هم کابل ته راغلي ایراني پلاوي مشر په مشخصه توګه څرګنده نه کړه، خو زیاته یې کړه چې تمه لري له افغانستان سره په نورو برخو کې هم اړیکې ټینګې او پراخې شي.
د ایران د سوداګرۍ، صنعت او کانونو وزیر سید محمد اتابک وايي: « هوډ لرو د افغانستان له دولتي چارواکو سره په لیدنو کې د راکړه ورکړې د سطحې لوړولو او دغه راز د خپلمنځي اړیکو ارتقا په برخه کې ترسره شوي کارونه تعقیب کړو او دغه راز نوي پروګرامونه هم ولرو، ترڅو دا دواړه هېوادونو په هره برخه کې یو بل ته ګټه ورسوي. همدانګه هڅه کوو د دواړو هېوادونو ترمنځ د سوداګرۍ کچې لوړولو لپاره ښه ګامونه پورته کړو؛ ځکه دا زموږ د دولت سیاست دی. که څه هم په دې برخه کې ډېرې هڅې شوې، خو موږ به بیا هم هڅه وکړو چې ټاکل شوي اهداف عملي شي.»
اقتصاد پوهان بیا له ایران د اقتصادي او سوداګریزو اړیکو پراختیا د افغانانو په ګټه بولي او زیاتوي چې دغه چاره کولی شي د افغانستان د صادراتو کچې په لوړوالي هم مثبت اغېز ولري او ورسره به یې اقتصاد هم لوړ شي.
د اقتصادي چارو شنونکی عبدالجبار ساپی وايي: « افغانستان له ایران سره په اقتصادي او ځانګړې توګه سوداګریزه او سیاسي برخو کې ښې اړیکې لري. د ایران حکومت د اسلامي امارت د حکومت په راتګ سره خپل لارې خلاصې پرېښودې، افغانانو ته یې وېزې بندې نه کړې، زموږ په ټرانسپورټ او ټرانزیټ کې ستونزې را نه غلې او له همدې امله په سختو شرایطو کې چې کله افغانستان له قحطۍ او قېمتۍ سره مخ و، زموږ تجارت ونه درېده او دواړو هېوادونو ښه ګټه ترې پورته کړه. زموږ اکثریت فابریکې د ایران په خامو موادو چلېږي او د سوونو میلیون ډالرو تجارت مو اوس میلیاردونو ډالرو ته لوړ شوی دی.»
د تېرو څلورو کلونو په موده کې د افغانستان او ایران ترمنځ د سوداګریزې راکړه ورکړې کچه په کلني ډول له سونو میلیون ډالرو څخه شاوخوا درې میلیارد ډالرو ته پورته شوې، خو د دې سوداګرۍ زیاته برخه واردات جوړوي چې تر ډېره نفتي او ساختماني توکي په کې شامل دي.
