د ریاست الوزرا اقتصادي مرستیال ملا عبدالغني برادر د بغلان د غوري سیمنټو د توليد فابریکې دریم فاز د جوړولو عملي کارونو پرانيسته وکړه.
ټاکل شوې دغه فاز د ۸۶.۷ میلیون امریکايي ډالرو په ارزښت په راتلونکو ۱۸ میاشتو کې بشپړ شي او په دې توګه به د يادې فابریکې د توليد ظرفيت په ورځنۍ توګه د ۵ زره ټنه سیمنټو توليد ته پورته شي.
د ریاست الوزرا اقتصادې مرستیال وايي، د یادې فابریکې د درېيم فاز جوړولو کارونو له پيل او فعاليت سره به سلګونه کسانو ته کاري فرصتونه برابر شي او د سیمنټو اړتیاوې به په کور دننه تر یوه بریده پوره شي.
د ریاست الوزرا اقتصادي مرستیال ملا عبدالغني برادر وايي: « د دې فابریکې ټول ارزښت ۸۶.۸ میلیونه امریکايي ډالره اټکل شوی دی چې ټولې چارې یې د ملي پراختیا شرکت له خوا پرمخ وړل کېږي. د غوري سیمنټو د نویو فابریکې ورځنی تولیدي ظرفیت ۵۰۰۰ زره ټنه دی او دا په هېواد کې له لویو صنعتي فابریکو ګڼل کېږي. د دې فابریکې ټولې عملي چارې به په ۱۸ میاشتو کې پای ته ورسېږي.»
د برادر په خبره، صنعتې پرمختګ د هر هېواد لپاره بنسټیز اهمیت لري او حکومت ژمن دی چې د هېواد صنعتي کېدو لپاره هڅو ته دوام ورکړي.
په ورته مهال د بغلان ځايي چارواکي وايي، حکومت په تېرو څو کلونو کې ثابته کړې چې د هېواد له زېرمو په ښه توګه ګټه اخلي او له خلکو غواړي چي ورسره همکار پاتې شي. دوی دا هم وايي، خلک دې په ودانېزو چارو کې له وطنې تولیداتو ګټه واخلي.
د بغلان والي عبدالرحمن حقاني وايي: « موږ د خصوصي سکټور له پانګوالو او متخصصینو څخه مننه کوو او له خپل ولس څخه مو هیله دا ده چې کورني تولید ته لومړیتوب ورکړي. د دولت او ولس ګډ کار، همکاري او ملاتړ هغه څه دي چې پرمختګ تضمینوي.»
بله خوا، د دولتي شرکتونو رياست د غوري سیمنټو فابریکه د هېواد صنعتې خپلواکۍ لپاره سترګام او د ملي تولید د ځواک پياوړتيا وسيله بولي.
د دولتي شرکتونو رییس احمدجان بلال وايي: « لکه څرنګه چې اسلامي امارت د هېواد آزادۍ ته ژمن و او د اسلامي نظام د حاکمیت لپاره یې بې ساري قربانۍ ورکړې، د هېواد آبادۍ ته هم ژمن دی او د بیا رغونې کارونه په ډېره چټکۍ سره روان دي. موږ به په نږدې راتلونکي کې د دې شاهدان یو چې داسې پرمختګونه به رامنځته شي چې په تېرو څو لسیزو کې به یې ساری نه وي لیدل شوی.»
د غوري سیمنټو فابریکه دوه فعال فازونه لري او په ورځني ډول ۷۰۰ ټنه سیمڼت تولیدوي.
باور دا دی چې د یادې فابریکې د درېیم فاز له فعالولو سره به تر ډېره بریده هېواد کې د سیمنټو بيې راټيټې شي او په تدریجي ډول به په دې برخه کې پر نورو هېوادونو تکیه هم راکمه شي.
