کابل ښاریان: بې روزګارۍ او د ژمې سړې هوا اندېښمن کړي یو 

د کابل ښار اوسېدونکي او  مرستندویه بنسټونه له نړيوالو غواړي،چې د خوراکي توکو سربېره دې د درملو برخه کې هم مرسته وکړي. 

افغانستان کې د بشري مرستو د تنظيم او توضېع کميسیون مشر شرف الدین مسلم هم وايي، نړيوال او مرستندويه ادارې دې له خوراکي توکو سربېره روغتيايي برخې هم ته پاملرنه وکړي. 

مسلم زیاته کړه:« په اوس وخت کې ورته ډېره اړتیا ده. يو خو دغه د صحي سکتور برخه ده،چې درملو ته اړتیا لري. زموږ غوښتنه هم دا له نړيوالو او مرستندويه ادارو دا ده، چې په دغه برخه کې مرسته وکړي. د افغانستان له  مظلوم ملت سره او دوهم دا چې ژمی را روان دی نو البسې ته اړتیا ده. همدا راز خوراکي موادو ته هم اړتیا ده.»

اخوا د سیاسي چارو یو شمېر شنونکي هم په دې باور دي،چې د اړمنو کسانو شمېر زيات او د مرستو کچه په کمه اندازه ده او په خبره یې نړیوال دې ټولو اړتیاوو ته په کتو خپلې مرستې چټکې کړي. 

د سیاسي چارو شنونکی نازک مير زيارمل وايي:«تر ډېره حده طبي توکي دي، نو اوس وخت کې خوراکي توکو  ته ډېره اړتیا ده،ورسره هغه ګرم وسايل چې ژمی راروان دی، هغه کسان چې په خيمه کې اوسېږي، د هغوی له پاره کمپلې دي، که لرګي نه وي نغدې پيسې هم ښې دي.»

کابل ښار یو شمېر اوسېدونکي وايي د ژمي په رارسېدو له نغدي پيسو نيولې، خوراکي او غيرې توکو ته اړتيا لري. 

د کابل ښار یو تن اوسېدونکی وايي:« د هر څه ضرورت دي، هم د خوراکي موادو ضرورت دی،هم د پيسو ضرورت دی راته. ځکه وس مو نه شته دی. غريب خلک یو، دا کراچۍ مو اخېستې ده.»

د کابل ښار یو بل اوسېدونکی بیا وايي:« نه نه، چا راسره مرسته نه ده کړې، مخکې به ښه وو، يو شی به يې راکاوه، اوس تشې بوشکې،تش شيان ورکوي.  ډ‌ېر شيان ورکوي، خو مشران يې وهي. »

عام خلک په دې باور دي،چې که د ژمي په رارسېدو ورسره ژمنۍ مرستې تر سره نه شي، نو لرې نه ده،چې له سخت حالت سره به شي.