ننګرهار کې یو شمېر صنعت کاران د برېښنا کمښت او د صنعتي پارک لپاره د منظم کانالیزاسیون او معیاري سړکونو له نه شتوالي شکایت کوي.
د دوی په خبره، د یادو ستونزو له امله يې ډېر وخت فعالیتونه نه وي او د یادو ستونزو د ژر حل غوښتنه کوي.
صنعت کار نور الحق وايي: « څومره چې اړتیا ده، صنعتي پارک هغسې نه دی؛ ځکه د سړکونو سیسټم یې خراب دی، کانالیزاسیون یې بشپړ شوی نه دی او همدا لامل دی چې فابریکه لرونکي زړه نه شي ښه کولی. دغه راز بله لویه ستونزه د برېښنا کمښت دی، هلته د اړتیا وړ برېښنا نه ده رسېدلې او په دې حساب صنعتي پارک لا نیمګړی دی.»
صنعت کار حیات الله وايي: « ډېر کاله وشول چې د صنعتي پارک سړکونه خراب پراته دي او د رغولو لپاره یې عمل ګام نه دی پورته شوی. له دې سره څنګ کې د برېښنا ستونزې هم لرو.»
په دې برخه کې پر کار بوخت کسان هم شکایت کوي چې د برېښنا کمښت له امله ډېری وخت بې روزګاره پاتې کېږي چې په خبره يې سرپرست حکومت باید د صنعت ستونزو حل ته لومړیتوب ورکړي.
کارګر رحمت الله وايي: « موږ له حکومت غوښتنه کوو چې د دې ډول کارخانو جوړېدو ته زمینه برابره کړي، برېښنا او امکانات ورکړي چې خلک کار په کې وکړي.»
کارګر هجرت الله وايي: « له حکومت غواړم چې د کارخونو مرسته او ملاتړ وکړي، ترڅو افغانان په خپل وطن کې کار وکړي او پردي وطن ته لاړ نه شي.»
د ننګرهار صنعت او سوداګرۍ ریاست مسولین ډاډ ورکوي چې یادو ستونزو ته يې پام دی او ننګرهار کې د ۴۰میګا واټه لمریزې برېښنا شبکې په بشپړېدو سره به صنعت کارانو د برېښنا ستونزه هم حل شي.
د ننګرهار صنعت او سوداګرۍ ریاست د سوداګریزو چارو آمر شاکرالله ستانکزی وايي: « صنعتکارانو ته به ۲۰ زره جریبه ځمکه د یوه خاص طرزالعمل له لارې ووېشل شي. همدارنګه دوی ته مو د ځینو موسسو په همکارۍ سولري برېښنا برابره کړې او د بازار موندنې په برخه کې هم په داخل او خارج کې نندارتونونه پلان شوي.»
ننګرهار کې صنعت کاران د صنعتي پارک د معیاري کېدو او د دوی د برېښنا د کمښت ستونزې پر حل داسې مهال ټینګار کوي چې د افغانستان برېښنا شرکت مسوولینو په همېشه بهار سب سټېشن کې د یو کپسیټور بانک کړی چې په بشپړېدو سره به یې د صنعت کارانو د برېښنا کمښت ستونزه تر یوې اندازې حل شي.
