د صنعت او سوداګرۍ وزارت ویاند اخوندزاده عبدالسلام جواد وايي، د ۲۰۲۵ کال په لومړیو شپږو میاشتو کې د افغانستان او پاکستان ترمنځ دوه اړخیزه سوداګري ۹۸۹ میلیونو ډالرو ته رسېږي چې له دې شمېرې ۲۷۷ میلیونه ډالر د افغانستان صادارات او پاتې نور واردات دي.
د صنعت او سوداګرۍ وزارت ویاند اخوندزاده عبدالسلام جواد وايي: « د ۲۰۲۵ کال په لومړیو شپږو میاشتو کې له پاکستان سره د افغانستان تجارت د ۹۸۹ میلیون ډالرو په ارزښت و چې له ډلې یې ۲۷۷ میلیونه صادرات او ۷۶۲ میلیونه ډالره واردات دي. پاکستان ته په اکثریت صادراتي توکو کې پنبه، د ډبرو سکاره، پیاز، رومي بانجان، کشمش، مۍ او تالک ډبره شامل دي.»
د سوداګرۍ او پانګونې خونې چارواکي بیا د تېر کال د همدې مودې پرتله د دواړو هېوادونو ترمنځ د سوداګرۍ ښه کېدو هرکلی کوي؛ خو وخت نا وخت د لارو بندېدو ستونزو ترڅنګ د یو شمېر نورو مسایلو د حل غوښتنه کوي.
د سوداګرۍ او پانګونې خونې د مدیره پلاوي غړی خان جان الکوزی وايي: « هغه شمېرې چې د صنعت او سوداګرۍ وزارت وړاندې کړي، پر بنسټ یې ویلی شم چې د تېر کال پرتله زموږ تجارت ښه شوی. زه هیله لرم نور هم ښه شي، خو له دې سره چې غلام خان بندر تړل دی، ځینې نورې ستونزې هم شته دي. موږ امیداوره یو چې پاکستان پر خپلو تعهداتو عمل وکړي.»
بله خوا، د اقتصادي چارو یو شمېر شنونکي د افغانستان اوسنی اقتصادي وضعیت د ډاډ وړ نه ګڼي او په خبره یې، د اقتصاد ښه کېدو لپاره اړینه ده چې د صادراتو او وارداتو په کچه کې توازن رامنځته شي.
د اقتصادي چارو شنونکی نورالله عزیز وايي: « په افغانستان کې اقتصادي وده که وي، هم ډېره سسته او بطي ده او د اوسنیو ستونزو حل لاره نه شي بلل کېدای. د یوه هېواد اقتصادي وده هغه وخت څرګندېږي چې ټول سکټورنه یې وده وکړي او دا وده دوامداره وي.»
د صنعت او سوداګرۍ وزارت له لوري له پاکستان سره د روان زیږدیز کال د لومړیو شپږو میاشتو سوداګرۍ راپور ښیي چې افغانستان په دې موده کې پاکستان ته د وچو مېوو، خوراکي او غیر خوراکي توکو په ګډون بېلابېلې قېمتي ډبرې او د ډبرو سکاره صادر کړي چې ټولیزه کچه یې شاوخوا ۲۸سلنه ده او له هغه هېواده یې بیا نږدې ۷۲سلنه واردات کړي.
