د خوست غلام خان بندر لار له تېرو لسو ورځو راهیسې د پاکستاني لوري له خوا د نامالوم دلیل له مخې تړل شوې.
د دې سوداګریزې لارې له تړلو کېدو سره یو شمېر سوداګر وایي، دا مهال د دغې لارې تړلو له امله دواړو لورو ته سلګونه بار وړونکي موټر ولاړ دي.
سوداګر ګلداد وايي: « رومي بانجان په ۱۰ یا ۱۵ روپۍ من خرڅېږي. دا بیه د کروندګرو مزدوري هم نه پوره کوي. موږ له دواړو دولتونو غوښتنه کوو چې سیاست له تجارت سره ګډ نه کړي.»
سوداګر سیدالرحمن وايي: « اوس افغانستان کې د مېوو او سبزیو فصل دی، هر کال په همدې وخت کې غلام خان بندر تړل کېږي. د افغانستان کروندګر له ډېرو ستونزو سره مخ دي. پخوا به دا مهال د بانجانو من په ۱۸۰ روپۍ و، خو اوس په ۲۰ روپۍ دی، منډتې(زردالو) له ۱۸۰ روپيو څخه ۱۰۰ روپیې ته ښکته شوې.»
په همدې حال کې يو شمېر کروندګر هم د خپلو محصولاتو د بیو له ټیټېدو شکایت کوي او زیاتوي، د یادې لارې په تړل کېدو سره په دې ولايت کې د تازه مېوې او سبزيجاتو بيې څو چنده راټيټې شوې دي.
کروندګر لایق شاه وايي: « زه د رومي بانجانو کاروبار کوم، له پاکستانه چې کله راځي من له د۲۰۰ تر درې۳۰۰ روپیو وي، خو زموږ په ۲۰ روپۍ شو، حتا د مزدورۍ لګښت نه جوړوي.»
کروندګر میرکی وايي: « بانجان هېڅ نه جوړوي، حتا د تخم پیسې هم نه جوړوي. که دا لاره خلاصه شي، بیا به له تاوان خلاص شو.»
په ورته مهال، د خوست د سوداګرۍ او صنايعو خونې مشر د انتقاد ګوته پاکستان ته نیسي او وايي، دې هېواد تل له غلام خان او نورو بندرونو د سياسي فشار په توګه ګټه اخیستې او بې له کوم تفاهم خپلې لارې د افغانانو پرمخ تړي.
نواب امیرزی له سرپرست حکومته غوښتنه کوي چې پاکستان د خبرو له لارې د سوداګرۍ نړیوالو اصولو منلو ته قانع کړي.
امیرزی په دې اړه وايي: « موږ د تل په څېر له پاکستانه ګیله لرو چې یو طرفه او په خپل سر لارې بندوي. پرته له دې چې افغانان خبر کړي او لږ وخت ورکړي، ترڅو مالونه بار نه کړي یا له نورو لارو کار واخلي، دوی لارې بندې کړي. له اسلامي امارت غوښتنه کوو چې په دې اړه له پاکستان سره خبرې وکړي.»
د خوست ولايتي مسوولين ډاډ ورکوي چې د یادې لارې د خلاصون لپاره يې هڅې پيل کړې دي.
خو د چارو د شنونکو په باور، که سرپرست حکومت په دې برخه کې جدي اقدامات ونه کړي، نو ښايي دا په دوامداره او موسمي توګه افغان سوداګر له مالي زیانونو سره مخ کړي.
