د روسيې له لوري د سرپرست حکومت رسميت پېژندنې د کابل او مسکو ترمنځ د سوداګرۍ پراختيا هيلې زياتې کړې دي.
له همدې امله د سوداګرۍ او پانګونې خونه د دواړو لوريو ترمنځ په راتلونکي کې د اقتصادي فرصتونو زياتېدو اټکل کوي.
د دې خونې مرستیال یونس مومند وايي، روسيه اوس مهال افغانستان ته په کلنۍ توګه څه باندې ۴۲۵میلیونو ډالرو په ارزښت صادرات لري، خو برعکس دې هېواد ته د افغانستان د صاردراتو اندازه د ۶ ميليونو ډالرو په ارزښت ده.
مومند باور لري چې د روسيې تازه پرېکړه به اقتصادي فرصتونه له اوسني هغو زيات کړي او په دې توګه به د کابل او مسکو ترمنځ سوداګري توزان پيدا کړي.
مومند په دې اړه وايي: « له روسیې مننه چې دا ګام یې پورته کړ. دا ګام به د روسیې او افغانستان پر اقتصادي اړیکو مثبت اغېز وکړي. زه فکر کوم هغه مهال چې افغانستان خپلواکي واخیسته، روسیه هغه مهال هم لومړنی هېواد و چې افغانستان یې پر رسمیت پېژندلی. زه فکر کوم دا یو مثبت ګام دی او هر هغه هېواد چې افغانستان په لومړي سر کې پر رسمیت وپېژني، ګټه به یې ډېره وي؛ دا ځکه چې افغانستان له فرصتونو ډک هېواد دی او موږ کولی شو په رسمیت پېژندنه کې ډېر اقتصادي تړونونه لاسلیک کړو.»
نوموړی د يوه ګډونوال په توګه په دوحې کې د خصوصي سکټور او له نشه يي توکو سره د مبارزې کاري ډلو دوه ورځنۍ ناستې ته هم اشاره کوي او زياتوي، په ناسته کې د نړيوالو له لوري د افغانستان پر خصوصي سکټور او بانکي سيسټم د يو لړ بنديزونو لرې کولو ژمنې وشوې.
د سوداګرۍ او پانګونې خونې مرستیال په دې اړه وايي: « لومړۍ موضوع زموږ له هغو ګاونډيانو شکایت و چې ځینې وختونه موږ ته اوامر صادروي او د دوی دا اوامر له نړیوالو اصولو سره ټکر لري. موږ د افغانستان د بانکونو یادونه وکړه او له نړیوالې ټولنې مو وغوښتل چې د نړیوالو بندیزونو په اړه زموږ بانکونو ته اطمینان ورکړي، ترڅو خپل کار په ډاډه زړه وکړي. درېیمه موضوع د افغانستان د کنګل شویو پيسو وه او دغه راز د اروپايي هېوادونو له خوا د وېزو نه ورکولو په تړاو مو یادونه او غوښتنه وکړه چې نور باید په افغانستان کې وېزې ور کړي.»
د اقتصادي چارو شنونکي هم د نړيوالو دغه ژمنې او په تېره بيا د روسيې له لوري د سرپرست حکومت رسميت پېژندنه مهم ګام بولي او ټینګار کوي چې د افغانستان لپاره له سیاسي او اقتصادي پلوه مثبتې پایلې لرلی شي.
د دوی په خبره، د روسیې په څېر له اغېزناکو هېوادونو سره تعامل کولی شي په هېواد کې د پراختیایي پروژو په تطبیق، کارموندنې او د لوږې په کمولو کې مهم رول ولوبوي.
د اقتصادي چارو شنونکی محمدالله مسلم وايي: « چین د روسانو له پورته کړي ګام هرکلی وکړ، زه فکر کوم دویم ګام به د چین وي؛ ځکه چې چین دلته ډېر اقتصادي قراردادونه لري. زما په اند، کله چې روس دا ګام پورته کړ، نو زموږ ګاونډیانو ته شرم دی چې دا کار نه کوي. دوی باید له روسانو مخکې دا کار کړی وی، خو اوس هم څه مشکل نه شته، ځکه د کاروان سر ته روسان ووتل. اسلامي امارت د هېچا لپاره خطر نه دی او په تېرو څلورو کالو کې ولیدل شول چې ډېر ښه روان دي. نو، په کار ده چې نور ګاونډي هېوادونه د افغانستان سرپرست حکومت په رسمیت وپېژني.»
د افغانستان لپاره د روسیې ځانګړي استازي ویلي، هېواد يې له ترهګرۍ سره د مبارزې او د نشه یي توکو د قاچاق مخنيوي په برخه کې د همکاریو لپاره سرپرست حکومت پر رسمیت وپېژاند.
روسیې له دې وړاندې هم له افغانستان سره اقتصادي او سوداګریزې اړیکې روانې ساتلې وې او د اسلامي امارت چارواکو د متقابلو همکاريو د پراختيا په موخه، مسکو ته پرله پسې سفرونه کړي.
