د ننګرهار ولایت مرکز جلال اباد ښار اتمې ناحیې په بهسود خاص سیمه کې د یونپس موسسې په ۱۸ میلیونو افغانیو لګښت د دوو پروژو چارې پیل کړې.
په دغو پروژو کې د سړکونو کانکرېټ اچولو سرېره، فرعي کوڅې، ویالې او پلچکونه شامل دي.
مسوولین وايي، په دې دواړو پروژو کې له۱۰۰ ډېرو کسانو ته د کار زمینه برابره شوې ده.
د جلال اباد ښاروالۍ مرستیال محمد اسحاق سعید وايي: « نننۍ دوې پروژې دي او د دواړو لګښت تقریبا ۱۸ میلیونه افغانۍ ده او په دواړو پروژو کې روزانه ۱۲۰ کسانو ته د کار زمینه برابره شوې. دا به د څلورو میاشتو په موده کې بشپړیږي او د ولسونو خدمت به پرې کیږي او د ولسونو ستونزې به هواریږي.»
دې پروژو کې پر کار بوخت کسان د ورته نورو پروژو د پلي کېدو غوښتنه کوي او وايي، له دې سره به د بېکارۍ کچه راکمه او د ځايي خلکو ورځنۍ ستونزې به هوارې شي.
د دې پروژو کارګر بلال وايي: « دا بې روزګاره خلک ټول پر کار بوخت شول. سړک پخیږي، موږ ډېر ترې خوشحاله یو او په آینده کې غواړو چې نورې پروژې هم راشي، ترڅو دا ولس په کار شي.»
د پروژې یو بل کارګر رحمن وايي: « غواړو چې له دغو پروژو سره څنګ کې موږ ته نورې پروژې هم راشي، ځکه موږ او نوورو ځوانانو ته به د کار زمینه هم برابره شي. موږ خوشحاله یو چې د وطن د آبادۍ لپاره کار کوو.»
د سیمې اوسېدونکي بیا د کار پر کیفیت ټینګار کوي او وايي، ستونزې باید په دایمي ډول حل شي.
د اتمې ناحیې اوسېدونکی شعیب وايي: « زموږ سړکونه له پخوا ډېر خراب وو، نو دغه پروژه چې اوس راغلې، موږ ډېره تمه او امېد لرو چې له کار سره یې باید کیفیت هم سم وي.»
یو بل اوسېدونکی ویس الدین وايي: « له دې علاوه، دا نور سړکونه چې زموږ دي، هغه هم حلقوي دي او یو کلی له بل کلي سره نښلوي. حتی د ښار بېروبار کمښت کې هم رول لري. موږ امېد لرو چې نورې پروژې به هم تطبیق شي.»
اوس مهال د جلال اباد ښار په بېلابېلو ناحیو کې د ښاروالۍ له داخلي عوایدو او همدارنګه د نړیوال بانک په مالي ملاتړ، ګڼې پروژې روانې دي چې په بشپړېدو سره به یې د خلکو ستونزې تر ډېره بریده هوارې شي.
