د غلام خان بندر چې د افغانستان او پاکستان تر منځ د سوداګرۍ یوه له لویو لارو ده، د پاکستان تازه پرېکړې په پربنسټ د سوداګرۍ پر مخ تړل شوې.
د خوست ځايي مسوولین هم د پاکستان له لوري د ياد بندر تړل تایيدوي، خو زياتوي چې د لامل په اړه يې ورسره مالومات نه دي شريک شوي.
د خوست والي ویاند مستغفر ګربز وايي: « غلام خان بندر لاره د پاکستاني لوري له خوا د هر ډول تګ راتګ پرمخ تړل شوې. پاکستاني لوري د لارې بندولو علت په خپله خاوره کې نا امني ښودلې.»
د سرحدي پولیسو ویاند عابدالله فاروقي وايي: « دوی مسوولینو ته ویلي چې په یاد بندر کې موجوده او منتظر موټر باید د بل بندر له لارې تېر شي. زموږ مسوولینو هڅه کړې چې دا مشکل د تفاهم له لارې حل کړي.»
په ورته مهال، د خصوصي سکټور استازي د پاکستان له لوري د غلام خان بندر تړلو لامل په قبايلي سيمو کې ناامني يادوي او زياتوي چې د بېرته پرانيستلو په تړاو يې له پاکستاني لوري سره خبرې دوام لري.
دوی دا اټکل هم کوي چې د غلام خان بندر بندېدو په صورت کې ښايي د سوداګريزو توکو د لېږد رالېږد له امله د تورخم او سپين بولدک پر لارو ګڼه ګوڼه زياته شي.
د سوداګرۍ او پانګونې خونې مدیره پلاوي غړی خان جان الکوزی وايي: « دا زموږ لپاره ډېر لوی زیان دی، ځکه چې زموږ مالونه په ډېرې اسانۍ له دې لارې ځي، خو اوس به ټول بوج په ډنډ پټان او تورخم باندې راشي. زموږ مالونه په درېیو استقامتونو تلل، خو د دې لارې په بندېدو سره به له دوو لارو ځي.»
د اقتصادې چارو شنونکي وايي، افغانستان او پاکستان له کلونو راهیسي په خپل منځ کې پراخه سوداګري لري، خو سیاسي ستونزو دغه سوداګري بې خونده کړې.
د دوی په خبره، پاکستان د دواړو هېوادونو ترمنځ اقتصادي اړیکي د سیاسي ستونزو قربانې کړې دي او تل يې هڅه کړې چې د دواړو غاړو سوداګرو ته مالي زیانونه واړوي.
د اقتصادي چارو شنونکی نورالله عزیز وايي: « متأسفانه پاکستان هغه هېواد دی چې د افغانستان ډېرې تجارتي اړیکې له دوی سره دي. له دوی سره زموږ د تجارت اندازه په کال کې تر دوه میلیارد ډالرو رسېږي، خو دا تجارتي اړیکې د مختلفو ستونزو له امله ټکنۍ شوې دي.»
پاکستان له دې وړاندې د تورخم او سپين بودلک په څېر مهمې ټرانزيټي لارې هم څو ځله تړلې دي. د شنونکو په باور، پاکستان دا کار هغه مهال کوي چې په افغانستان کې د مېوو حاصلات ترلاسه او سوداګر يې پاکستان او يا د دې هېواد له لارې نورو هېوادونو ته د صادرولو نیت وکړي.
