په هلمند ولایت کې په بېلابېلو برخو کې کوچنۍ کارخونې مخ په زیاتېدو دي.
د صابون جوړولو دغه کوچنۍ کارخونه په یو میلیون افغانیو جوړه شوې چې اوس مهال په کې پنځو تنو ته د کار زمینه برابره شوې.
د دې کارخونې مسوول حبیب الله خاموش وايي، اوس مهال دا ډول کارخوني زیاتي شوې خو له مسولینو یې غواړي چې پر کیفیت یې کار وکړي او خلک پر داخلي تولیداتو بي باوره نه کړي.
خاموش زیاتوي:« دا کار مو اول وار راشروع کړی، تقریبا له یو میلیون افغانیو، کرار کرار مو دا کار مخته وړی په ښار کې مو توزیع درلود شامپو مو خرڅوله او صابون مو توزیع کاوه. مخکې په ښار کې د شامپو کارکوونکي لږ وه، اوس ډېر شوې.»
د وړو کارخونو یوشمیر نور مسوولین بیا وايي، اوس مهال کوچني صنعت مخ پر ودې دی او ډېری کسان د خپلې پانګې په اندازه پانګونه کوي.
دوی له سرپرست حکومته غواړي چې د کاروبار لپاره دي منظم پلان او ځمکې په اختیار کې ورکړي.
د یوې کارخونې مسوول حکمت الله وايي:« انشاالله ورځ په ورځ پرمختګ راون دی، نوي ځوانان راځي هر کسب کې خپل د ځان او خپلې راتلوونکې لپاره کار کوي.»
د یوې کارخونې مسوول عبدالرحمان بیا وايي:« دا کارونه دې پر کټګوریو وویشل شي د بیلګې په ډول دا دي مالومه شي چې د اوبو څو شرکتونو ته اړتیا شته.»
د هلمند د صنعت او سوداګرۍ ریاست مسوولین وایي، د اسلامې امارت د رهبر د فرمان پر اساس پلان لري چې نژدې وخت کې د کوچنیو صنعتکارانو لپاره ځمکې وویشي ترڅو دوی وکولیی سې خپل صنعت ته پراختیا ورکړي.
د هلمند صنعتي پارکونو امر فضل احمد فضلي وايي:« د صنعت او تجارت ریاست خپل د وزارت په همکارۍ په خاص ډول د شیخ صاحب امیرالمومنین ۳۷۵ او ۲۷۰۸ ګڼې حکم پر اساس د کوچنیو صنعتکارانو لپاره منظور کړی چې په هر ولایت له ۱۰ تر ۵۰ جریبه ځمکه د کوچنیو صنکارانو لپاره ځانګړې شي نو د دې لپاره موږ کار کوو چې کوچنیو صنعتکارانو ته ځمکې ورکړو.»
هلمند کې د کوچنیو صنعت کارانو ترڅنګ له ١٥٠ زیاتې لویې تولیدې کارخونې هم فعالي دي چې په بېلابېلو برخو کې تولیدات لري.
