د صنعت او سوداګرۍ وزارت چارواکي د پاکستان ګوادر بندر ته په شارې وایي، د دغه هېواد د بندرونو له لارې افغان سوداګرو له هند او یو شمېر نورو هېوادونو سره راکړه ورکړه کولی شي.
دوی د پاکستان بندرونه د افغانستان سوداګرۍ لپاره مهم بولي او زياتوي چې پاکستان هم د افغانستان له لارې هڅه کوي له منځنۍ اسیا سره راکړه ورکړه وکړي.
د صنعت او سوداګرۍ وزارت ویاند اخوندزاده عبدالسلام جواد وايي:« پاکستان د سوداګرۍ اړخه د افغانستان لپاره خورا مهم دی. موږ د دغه هېواد له لارې هند او یو شمېر نورو هېوادونو سره سوداګریزې اړېکې لرو او همدارنګه پاکستان هم د فغانستان له لارې له منځنۍ اسیا سره راکړه ورکړه لري.»
په ورته مهال ځيني پاکستاني چارواکو ګوادر بندر ته له اسټراليا د افغان سوداګرو د ټرانزیټي توکو د دویمې بېړۍ را رسېدو هرکلی کړی.
د پاکستان سمندري چارو وزیر محمد جنید انور چودري ګوادر بندر افغانستان سوداګرۍ لپاره خورا مهم بللی او ويلي يې دي، په وچه کې له پروت افغانستان سره يې د سوداګریزې دروازې په توګه ګوادر بندر د همکاريو يوه برخه ده.
چودري زیاته کړې: «موږ له تېرې څه مودې راهیسې هڅه کوله، چې یو داسې څه رامنځ ته کړو، څو په وچه کې پروت د افغانستان صادراتو او وارداتو پر وړاندې یوه ستراتېژیکه دروازې پرانیستل شي.»
هغه دغه راز نړۍوالو بازارونو ته د افغانستان د اسانه لاسرسي په برخه کې د ګوادر بندر پر رول ټینګار کړی دی.
د پاکستان ډاڼ ورځپاڼې هم په دې اړه لیکلي، ددغه هېواد د اقتصادي همغږۍ کمېټې له خوا پر افغان سوداګرو د بانکي تضمینونو لرلو اجبار لغوه کول هم د دې سبب شوي چې د سوداګرو پر وړاندې اسانتیاوې رامنځته او د دواړو هېوادونو ترمنځ اقتصادي اړېکې پراخې شي.
دغه ورځپاڼې د ګوادر بندر ریيس له قوله لیکلي، چې د تازه بېړۍ بریالي تمځای ته رسېدل او چټک بار ښکته کول هم دا ښيي چې ګوادر بندر اوس د عصري سوداګرۍ لپاره بشپړ چمتو دی.
شاه عرفان احمد ویلي، د ګوادر بندر پراخېدونکی رول به نه یوازې د افغانستان لپاره، بلکې د مرکزي اسیا لپاره هم اقتصادي فرصتونه رامنځته کړي.
احمد زیاته کړې: «موږ هڅه کوو چې ګوادر بندر نه یوازې د افغانستان، بلکې د مرکزي اسیا لپاره هم د باور وړ سوداګریز دهلېز جوړ کړو.»
یو شمېر افغان سوداګر هم د پاکستان ګوادر د افغانستان سوداګرۍ لپاره مهم بولي، خو وایي، که پاکستان په رښتیني مانا په خپلو ژمنو ودرېږي او افغان سوداګرو پر وړاندې ستونزې جوړې نهکړي.
افغان سوداګر عبدالجبار ساپی وايي:« ګوادر بندر د افغان سوداګرو لپاره خورا مهم بندر دی ځکه کولی شي چې د دغه بندر له لارې ټولې نړۍ ته خپل توکي ولېږدوي خو شرط لري چې پاکستان په خپلو ژمنو کې پاتې رانهشي او پرې ودرېږي.»
د پاکستان ګوادر بندر ته دویمه سوداګریزه بیړۍ له استرالیا راغلې چې ۲۰زره ټنه ډای امونیم فاسفیټ یې رانتقال کړې دي.
په دې وروستیو کې افغانستان ته د پاکستاني پلاوي د سفر پر مهال ژمنې شوې وې چې د افغان سوداګرو پر وړاندې به ټول خنډونه لرې کړي چې له مخې یې دوی ته ستونزې جوړوي.
