کابل کې د صنعت اوونۍ په مناسبت شپږ ورځنی ملي نندارتون پرانیستل شو او په کې صنعتکارانو بېلابېل توکي نندارې ته وړاندې کړل.
د سرپرست حکومت مهم چارواکي ادعا کوي چې واک ته له رسېدو راهيسې د افغانستان صنعت وده کړې او په دې سکټور کې خلکو ته د کاري فرصتونو پيدا کېدو ترڅنګ، په ځينو سکټورونو کې افغانستان پر ځان بسیاينې ته هم رسېدلی ی.
د رياست الوزرا اقتصادي مرستيال ملا عبدالغني برادر اخوند وايي، سرپرست حکومت د وارداتو په پرتله د صادراتو زياتولو طرحه وروستۍ کړې او په همدې موخه پر هغو عوضي وارداتي توکو تعرفه لوړه شوې چې افغانستان په کې د کورني توليد له امله پر ځان بسيا دی.
برادر په دې اړه: « اسلامي امارت د خصوصي سکټور د ملاتړ په موخه پر هغو وارداتي اقلامو ګمرکي تعرفې لوړې کړې دي چې په کور دننه تولیدېږي او د هېوادوالو اړتیاوې پوره کولی شي. دغه راز ټولو امارتي ادارو ته هدایت شوی چې د خصوصي سکټور د ودې په خاطر دې په خپلو خریداریو، تدارکاتو او تدارکاتي پروسو کې کورنیو تولیداتو او محصولاتو ته لومړیتوب ورکړي.»
د رياست الوزرا اداري مرستيال عبدالسلام حنفي وايي: « الحمدالله د افغانستان اسلامي امارت د صنعت د ودې او له کورنیو تولیداتو د ملاتړ لپاره، په مختلفو برخو کې تل د صنعتګرو او پانګوالو ملاتړ کړی او ملاتړ به یې کوي.»
جګ پوړي چارواکي له صنعتکارانو غواړي چې د توکو په توليد او توريد کې نړيوالو معيارونو ته جدي پام وکړي. دا په داسې حال کې ده چې ځيني نور چارواکي د افغاني توکو کيفت او معيار لوړ بولي او له پانګوالو د پانګونې په غوښتلو سره ډاډ ورکوي چې د خپلو پالیسيو په وسيله به د افغانستان صنعتي کېدو هڅې وکړي.
د صنعت او سوداګرۍ وزارت سرپرست نورالدین عزیزي وايي:« له ټولو شرکتونو، فابریکو او مسوولینو غوښتنه کوم چې قېمتونه مه لوړوئ او کیفیت مه ټیټوئ. زه ډاډه یم چې هېڅوک د خپلو محصولاتو نوم نه بدوي.»
د اقتصاد وزارت سرپرست دین محمد حنیف وايي: « له بهرنیو پانګوالو هم غواړم چې په پوره باور سره افغانستان ته راشي او په مختلفو سکټورونو او په ځانګړې توګه صنعتي سکټور کې پانګونه وکړي.»
د کور او ښار جوړولو سرپرست مولوي حمدالله نعماني وايي: « د افغانستان اسلامي امارت د یوه حکومت په توګه مسوولیت لري چې صنعتګرو ته هغه لارې او امکانات برابر کړي چې هغوی ورته اړیتا لري.»
د کانونو او صنایعو خونه اوسني شرايط د صنعتي ودې، پرمختګ او ځان بسیاینې لپاره موقع ګڼي او په خبره يې دا مهال افغانستان په ١٦٨ سکټورونو کې پرځان بسیا شوی او په دې توګه کورني صنعت ١٢ سلنه وده کړې.
د افغانستان برېښنا شرکت رییس عبدالباري عمر وايي: « زه ټولو صنعتکارانو ته اطمینان ورکوم چې موږ شپه او ورځ کوښښ کو چې ستاسو صنعتي پارکونو او فابریکو ته ډاډمنه برېښنا درورسوو.»
د کانونو او صنایعو خونې رییس شېر باز کمین زاده وايي: « د خدای شکر دی چې موږ اوس مهال په ۱۶۸ خصوصي سکټورونو کې ځان بسیاینې ته رسېدلي یو. موږ اوس د ټول هېواد پر کچه ۶۵۰۰ فابریکې لرو چې په کې ۴۲۰ زره تنه په کارونو بوخت دي.»
بل پلو، په نندارتون کې غرفه لرونکي دا ډول نندارتونونه صنعتي محصولاتو ته د بازار موندنې لپاره مهم ګڼې او له سرپرست حکومت غواړي چې بهرنیو بازارونو کې توکو ته بازار موندنه وکړي.
د نندارتون ګډونوال مسعود وايي: « زه وایم چې تولیدي شرکتونه او د منتاژ سکټورونه دې سره بېل شي.»
نندارتون کې غرفه لرونکی فهیم احمدي وايي: « ډېری هغه شرکتونه چې له بهر دلته راځي، خپل تولیدات په ارزانه بیه وړاندې کوي او زموږ صنعتکاران نه شي کولی له هغوی سره سیالي وکړي.»
د صنعت څلورم نندارتون د پرانیستنې په مراسمو کې د اسلامي امارت جګ پوړو چارواکو، د کابل کې د ګڼو هېوادونو سفیرانو او لوړ پوړو چارواکو حضور درلود.
د دې نندارتون په ۷۰۰ غرفو کې یوازې د افغانستان تولید کړي توکي نندارې ته اېښودل شوي دي.
د یادونې وړ ده چې په دې شپږ ورځني نندارتون کې ښځینه صنعتکارانې ګډون نه لري.
