سکندر زیاته کړه:« له ټولو مسوولينو د زړه له تله مننه کوم،چې ښه روحیه یې زموږ لوبغاړو ته ورکړه. د لوبغاړو لپاره تر ټولو همدا مهمه ده،چې هغوی ته باید ښه روحيه ورکړل شي، مادي او معنوي امکانات په خپل حال، خو لوبغاړو ته ښه روحیه ورکول، دا دوی ته انرژي ورکوي.»
د تکواندو ملي لوبډلې لوبغاړی مرتضی صالح چې د لوبې په ګټلو یې د سرو زرو مډال تر لاسه کړی، وايي خوښ دی،چې د افغانستان په سختو شرایطو او نشتو امکاناتو يې يادو سيالیو کې ګډون وکړ او د سرو زرو مډال يې تر لاسه کړ.
صالح زیاتوي:« زه ډېر خوشاله يم،چې د لومړي ځل لپاره ما په دې سياليو کې ګډون وکړ، او دې ولس ته مو اتلولي راوړه او د تکواندو له فدراسيون او اسلامي امارته مننه کوم،چې تشویق يې کړو.»
د تکواند یو بل افغان لوبغاړی حکمت الله ذهين وايي:« زه حکمت الله ذهين يم، د افغانستان د تکواندو د ملي لوبډلې يو تن لوبغاړی، ما خپله د ۶۸ کيلو وزن برخه کې لوبه کړې وه، وروسته له شپږو مسابقو څخه وتوانېدم،چې د سپينو زرو مډال وګټم.»
د بدنې روزنې او ورزش ریاست مشر نظر محمد مطمین بيا لوبغاړو ته ډاډ ورکوي،چې هر ډول مالي امکانات به ورته برابر او د راتلونکو سيالیو له پاره به ورسره همغږي وکړي.
مطمين زیاته کړه:« زه چې څه هم په لاس کې ولرم،څومره امکانات چې وي، د لوبغاړو حق به ورکول کېږي، حق به یې نه خورو او هڅه کوو،چې ورزش ته ارتقاء ورکړو، پرمختګ ورکړو، په شلو کلونو کې چې کومې لاسته راوړنې لرو، هغه وساتو او نورې لاسته راوړنې هم ولرو.»
جي ون سيالۍ،چې د لومړي ځل لپاره په پاکستان هېواد کې تر سره شوې، له ۱۷ هېوادونو په کې ۴۲۲ لوبغاړو برخه اخيستې وه. دغه سيالیو کې افغان لوبډلې څلورم مقام خپل کړ.
دې سيالیو کې افغان لوبغاړو اوه مډالونه وګټل،چې غلام مرتضی صالح د سرو زرو، حکمت الله ذهين، محمد اشرف شکران او رامش حسيني د سپينو زرو او جواد ځاځي، عاطف يعقوبي او شهرام خاکسار بيا د برونزو مډالونه تر لاسه کړل.
