د پروان د اطلاعاتو او فرهنګ ریاست مسوولین وایي، په دې ولایت کې د توپ درې استوپې د بیارغونې چارې ۹۸ سلنه بشپړې شوې او په خبره یې ډېر ژر به يې پاتې چارې هم بشپړې شي.
د اطلاعاتو او فرهنګ ریاست د ګرځندوی آمر عتیق الله ساپی وايي:« د استوپې نږدې ۹۸ سلنه کار او ساختماني جوړښت بشپړ شوی دی. موږ هڅه کوو چې پاتې کارونه یې هم د اطلاعاتو او کلتور ریاست او همکارو موسسو پر همکارۍ بشپړ کړو.»
په ورته وخت کې د پروان یو شمېر فرهنګيان د تاریخي آثارو د ساتنې پراهمیت ټینګار کوي او له سرپرست حکومت غواړي چې ټولو تاریخي ابداتو ته ځانګړې پاملرنه وکړي.
لیکوال شکرالله شمس وايي: « حکومت دنده لري چې د لرغونو آثارو په ساتنه او بیا رغونه کې چې زموږ د هېواد او ټولنې تاریخ او هویت بیانوي، بې درېغه هڅې وکړي.»
د پروان یو شمېر اوسېدونکي هم له مسوولینو غواړي چې د ياد ولایت د فرهنګي او تاریخي میراثونو ساتنې ته زیاته پاملرنه وکړي.
د پروان اوسېدونکی محمد وايي: « د افغانستان له حکومت غوښتنه کوم چې د فرهنګي میراثونو ساتنې ته پاملرنه وکړي او که چېرې زیانمن کېږي بېرته یې ورغوي.»
د پروان یو بل اوسېدونکی حشمت الله وايي: « موږ له اوسني دولت غوښتنه لرو چې د فرهنګي میراثونو او لرغونو توکو ساتنې ته پاملرنه ډېره کړي. فرهنګي میراثونه زموږ په هېواد او نورو هېوادونو کې له مهمو آثارو ګڼل کېږي چې باید د ستانې لپاره یې هڅې وشي.»
د پروان د اطلاعاتو او فرهنګ ریاست د مالوماتو له مخې، په دې ولایت کې له ۸۰ زیات تاریخي او فرهنګي ځایونه ثبت شوې دي.
