د امريکا ولسمشر ډونالډ ټرمپ پر ګڼو هېوادونو د تعرفې لګولو په لېست کې افغانستان هم شامل کړی او په دې سره يې دغه هېواد ته د افغانستان پر صادراتي توکو ۱۰ سلنه تعرفه لګولې ده.
دې ته په غبرګون کې د اقتصاد وزارت مسلکي معین عبداللطیف نظري د امریکا له لوري د افغانستان پر صاداراتو ۱۰ سلنه تعرفې لګول غیر عادلانه اقدام ګڼلی.
نظري په دې اړه وايي: « همدا شېبه چې موږ او تاسو خبرې کوو، امریکا د افغانستان پر محصولاتو هم تعرفه وضع کړې ده. موږ غواړو دغه پروسه هم پای ته ورسول شي، د دواړو هېوادونو ترمنځ واردات او صادرات پيل شي. موږ په سیاست کې یوه مقوله شته چې وايي، په سیاست کې دایمي دوښمني او دوستي نه شته، بلکې دایمي ګټې شته دي. هم زموږ او هم د امریکا ګټې ایجابوي چې دغه اړیکې له سره پيل شي او لکه څرنګه چې ما ټینګار وکړ، دا اړیکې باید د متقابل درناوي او د یو بل په چارو کې د لاسوهنې نه کولو پر بنسټ وي. په دې صورت کې د بندیانو په ګډون په ټولو مسایلو بحث کېدای شي.»
تېر کال د امريکا او افغانستان ترمنځ د سوداګرۍ کچه ۳۴ ميليونه ډالرو ته رسېده.
د مالوماتو له مخې، افغانستان امريکا ته د ۲۲.۶ ميليونو ډالرو او برعکس امريکا افغانستان ته د ۱۱.۴ ميليونو ډالرو په ارزښت توکي صادر کړي چې د ټرمپ وروستی اقدام به دغه معادله زيانمنه کړي.
د سیاسي او اقتصادي چارو کارپوهان وایي، د امریکا له لوري د افغانستان پر صادراتو د تعرفې لګول به سوداګري زیانمنه کړي او د دغې تعرفې د لرې کېدو غوښتنه کوي.
د سیاسي چارو کارپوه محمد سلیم پیګیر وايي: « څومره چې ټرمپ فکر کوي، موږ امریکا ته دومره ډېر صادرات نه لرو. دا د امریکا د ولسمشر بې خبري ښيي او نور هېوادونه هم حق لري چې برعکس پر امریکايي محصولاتو تعرفه وضع کړي. په دې برخه کې یوازې عام وګړي دي چې زیان ورسېږي.»
دغه تعرفې داسې مهال لګول کېږي چې دوې اوونۍ وړاندې د خليلزاد پر مشرۍ يو پلاوي له افغان چارواکو سره د امريکا او اسلامي امارت پر اړیکو خبرې کړې وې.
د چارواکو په خبره، له واشنګټن سره د کابل اړيکې د پرمختګ په حال کې دي او تمه ده چې روان کال به د امریکا په شمول یو شمېر هېوادونه اسلامي امارت پر رسمیت وپېژني.
د اقتصاد وزارت مسلکي معین عبداللطیف نظري وايي:« دوی مسوولیت او دنده لري چې له اسلامي امارت سره تعامل بېرته پيل کړي، اسلامي امارت پر رسمیت وپېژني، ترڅو موږ وکولی شو له نړیوالې ټولنې سره د اړیکو یو نوی فصل پيل کړو. زموږ هیله مندي دا ده چې روان کال به ډېر هېوادونه را مخکې شي، له موږ سره به اړیکې جوړې کړي. امېد لرو امریکا هم د هغو هېوادونو له ډلې وي چې له موږ سره اړیکې پيل کوي او په دې سره وکولی شو د امریکا او افغانستان ترمنځ د اړیکو یو نوی باب پرانیزو.»
دا په داسې حال کې ده چې تېره ورځ سي.اېن.اېن ټلویزیون په يوه راپور کې ويلي، د افغانستان سرپرست حکومت تر ممکنه حده له امريکا سره د اړيکو جوړولو هڅه کوي.
دغې امريکايي رسنۍ زیاته کړې، اسلامي امارت کابل ته له ورغلي امريکايي پلاوي غوښتي چې حکومت یې پر رسميت وپېژني.
