د افغان سولې لپاره د امریکا پخواني ځانګړي استازي زلمي خلیلزاد په پاکستان کې روان امنیتي وضعیت د دې هېواد د نظام د پایښت لپاره جدي ګواښ ګڼلی او د همدې وضعيت په پايله کې يې د پاکستان د اوسني نظام د پاشل کېدو احتمال مطرح کړی.
همداراز خلیلزاد د مارچ پر ۲۲مه هم خبرداری ورکړی و چې د پاکستان نظام د ناکامېدو او سقوط لور ته روان دی او له اسلام اباد یې غوښتي و چې د مخنیوي لپاره یې پراخ اصلاحات پيل کړي.
هغه زیاته کړې: « د پاکستان خلکو ته دې ملي ورځ مبارک وي. سره له دې چې په هېواد کې یې شرایط ډېر سخت دي.»
دې پخواني امریکايي ډېپلومات داسې مهال د پاکستان پر وضعیت اندېښنه ښودلې چې د شنبې په ورځ پاکستاني ځواکونو په بلوچستان کې د بلوڅانو د یووالي کمېټې مشره ماهرنګ بلوڅ ونیوه او هلته یې پر سوله يیزو لاریون کوونکو ډزې هم وکړې چې په پایله کې یې ۳ لاریون کوونکي ووژل شول او ۷ نور ټپیان شول.
د سیاسي چارو شنونکي وايي، اسلام اباد له څو لسیزو راهیسې له پښتنو او بلوڅانو سره د بې عدالتۍ ترڅنګ د تاوتریخوالي ډک چلن کړی او په خبره يې د دې هېواد امنیتي ادارو په سیمه کې د خپلو اهدافو لپاره داسې پالیسۍ مخته وړې دي چې اوس يې پایلې تجربه کوي.
د سیاسي چارو شنونکی اختر محمد راسخ وايي:« د پاکستان د نظامي ګرانو او استخباراتي کړو په اړه د زلمي خلیلزاد وینا چې وايي په پاکستان کې نا امنۍ او په سیمه کې سیاسي او اقتصادي وضعیت، دا د دوی د کښت ثمره او د کړنو نتایج دي.»
د سياسي چارو شنونکی نجيب الرحمن شمال وايي: « خلکو او ملکي ځواک له بده مرغه رول نه درلود، بلکې ټولې پرېکړې د پاکستان د نظامیانو له خوا په مختلفو سطحو کې نیول کېږي. که څه هم د پاکستان خلکو څو ځله د غیر ملکي حکومتونو په انتخاب کې ګامونه پورته کړي، خپل استازي یې حکومت او پارلمان ته استولي، خو دغه کسان د پاکستان د داخلي چارو او ننګونو په اړه په پرېکړو کې ونډه او واک نه لري. خلیلزاد هم له همدې امله نیوکه کړې او ویلي یې دي چې د پاکستاني نظامیانو ناسم عمل په پاکستان کې د اوسنیو بحرانونو لامل دی، دا خبرې یو حقیقت دی.»
خلیلزاد داسې مهال د پاکستان حکومت لپاره امنیتي وضعیت تر هر بل وخت زیات خطر ناک بولي چې په پاکستان کې د امریکا سفارت چارواکو څو ځله د اعلامیو په خپرولو سره له خپلو وګړو غوښتي چې دغه هېواد ته له سفر کولو ډډه وکړي او هم یې په دې هېواد کې مېشتو امریکایانو ته خبرداری ورکړی چې عامه ځایونو ته له تګ راتګ پښه ونیسي.
