د اقتصاد وزارت او خاتم النبیین پوهنتون علمي کادر په افغانستان کې د ټاپي پروژې د اقتصادي اغېزو په اړه علمي بحثونه ترسره کړل.
په دې اړه جوړ شوي علمي کنفرانس کې د اقتصاد وزارت چارواکي ټاپي پروژه د افغانستان لپاره له اقتصادي اړخه حياتي بولي او زیاتوي چې د ګازو لېږدونې دغه پروژه به په کلني ډول افغانستان ته شاوخوا ۴۰۰ میلیونه ډالره د حق العبور عاید په لاس ورکړي.
د اقتصاد وزارت مسلکي معين عبدالطیف نظري وايي: « ټاپي پروژې به عملا ً په افغانستان کې د اقتصاد قدرت هندسه له بنسټیز بدلون سره مخ کړي. دا پروژه کولی شي د افغانستان د اقتصادي ودې او پراختیا په برخه کې د پام وړ رول ولوبوي.»
د اقتصاد وزارت معین دغه راز زیاتوي، پر سرپرست حکومت د نړیوالو له لوري له اقتصادي بندیزونو سربېره هم تېر کال د نورو کالونو پرتله افغانستان د پام وړ اقتصادي وده کړې.
عبدالطیف نظري یې لامل د ټاپي په څېر د لویو پروژې پیلېدل، پلي کېدل او د پانګونې جذب بولي.
د اقتصاد وزارت مسلکي معين په دې اړه وايي: « ټاپي پروژه کولی شي افغانستان کې د کارموندنې او بېکارۍ کمېدنې په برخه کې هم ډېر مهم رول ولوبوي. د اسلامي امارت یو له ستراتیژیکو پلانونو دا دی چې افغانستان کې د بېکارۍ ستونزې ته د پای ټکی کېږدي. باید زموږ ځوان نسل د دندې او شغل خاوند شي، د کورنیو د خرید قدرت پياوړی شي او دا پروژه کولی شي په دې برخه کې له موږ سره مرسته وکړي.»
له بلې خوا، د یاد وزارت ویاند په خواله رسنيو کې هغه خپرې شوې ګنګوسې رد کړې چې وايي د یو شمېر ګاونډیو هېوادونو له لوري د ټاپي پروژې د پلي کېدو پر وړاندې خنډونه رامنځته شوي.
عبدالرحمان حبیب وویل، له تېرې یوه نیمې میاشتې د یادې پروژې عملي چارې روانې دي.
حبیب زیاته کړې: « د خدای شکر دی ټولې ستونزې حل شوي او دا پروژه له یوې نیمې میاشتې راهیسې د افغانستان په خاوره کې پيل شوې او چارې یې په نورمال او ښه حالت کې روانې دي. دا مهال د دې پروژې شاوخوا ۱۰ کیلومټره کارونه مخکې تللي او پاتې یې هم په چتکۍ روان دي.»
د ټاپي په نوم د ګازو لېږدونې پایپ لاین چې شاوخوا ۱۸۰۰کیلومټره اوږدوالی لري، د افغانستان له لارې پاکستان او هند ته د ترکمنستان ګاز لېږدوي.
د دې نل لیکې ۱۴۷کیلومتره به د ترکمنستان په خاوره کې، ۷۳۵ کیلومتره به یې په افغانستان کې له هرات، فراه، هلمند او کندهار ولایتونو تېرېږي او ترڅنګ به یې ۸۰۰ کیلو مترو په اوږدوالي نوره نل لیکه له پاکستان تېره او هند ته رسېږي.
