د بلوچستان یووالي کمېټې د یوې اعلاميې په خپرولو سره ویلي، پاکستاني ځواکونو د دې کمېټې پر سوله ییزو لاریون کوونکو له تاوتریخوالي ډک برید کړی او د يادې کمېټې مشره ماهرنګ بلوڅ او یو شمېر نور غړي یې نیولي دي.
په اعلاميه کې راغلي، له دوو ورځو راهیسې د بلوڅانو د یووالي کمېټې د لاریونونو موخه له بندخونو د خپلو هغو غړیو د آزادولو په موخه کېږي چې پاکستان یې پر وړاندې د نه خوشې کولو او زور تګلار غوره کړې ده.
اعلاميه کې وړاندې ویل شوې، پاکستاني ځواکونو پر لاریون کوونکو اور غورځوونکي ګازونه کارولي او مخامخ ډزې یې پرې کړې دي.
د اعلامیې یوه برخه:« د پاکستان امنیتي ځواکونو ډاکټر ماهرنګ بلوڅ او یو شمېر نور کسان نیولي. د لاریونونو پرمهال ښځې او ماشومان هم په ظالمانه توګه تر بریدونو لاندې راغلي. زموږ موخه دا وه چې د کمېټې غړي بیبارګ بلوڅ او ورور یې حمال اېلیاس، سعدیه او یو شمېر نورې ښځې او سړي له بندخونو آزاد شي، خو د پاکستان حکومت تل د زورزیاتي له اصولو کار اخیستی دی.»
د ماهرنګ بلوڅ خور د نوموړې له نیولو وروسته د هغې له اېکس پاڼې پر نړیوالې ټولنې غږ کړی چې د ماهرنګ په ګډون د بلوڅانو یووالي کمېټي مرکزي غړیو د آزادېدلو لپاره ورسره همکاري وکړي.
په ورته مهال، د پاکستان د بشري حقونو کمېسیون هم د دې هېواد له امنیتي ادارو غوښتي چې د ماهرنګ بلوڅ په ګډون هغه بلوڅان خوشې کړي چې د خپلو بشري حقونو د اعادې لپاره مبارزه کوي.
د پاکستان د بشري حقونو کمیسيون ویلي: « د بشري حقونو کمیسيون له دولت جدي غوښتنه کوي چې د تاوتریخوالي له اقداماتو لاس واخلي او د مخالفو نظرونو ځپل ودروي. د بلوڅو یووالي کمېټې مشرانو نیول او د مخابراتي شبکو بندول نامعقول غبرګونونه دي چې د خلکو نارضایتي به ورسره لا زیاته شي.»
د دې ترڅنګ، د جمهوري ملي غورځنګ مشر محسن داوړ هم پر بلوڅ لاریون کوونکو د پاکستاني ځواکونو ډزې او د ماهرنګ بلوڅ نېونې ته په غبرګون کې ویلي، له بلوڅانو سره دا ډول چلن به د پاکستان پر وړاندې ننګونې نورې هم زیاتې کړي.
داوړ زیاته کړې:« د پولیسو له لوري ډاکټر ماهرنګ او د ښځو او ماشومانو په ګډون د سوله ییزو فعالانو نېونه د شرم وړ خبره ده. د حکومت له لوري داسې ظلمونه به د مقاومت اور نور هم زیات کړي. نو موږ په سمدستي توګه د ټولو فعالانو د ازادېدو غوښتنه لرو.»
د بلوڅو یووالي کمېټې له دوه ورځو راهیسې د خپلو یو شمېر مدني فعالانو د خوشې کولو لپاره لاریونونه پیل کړي، خو د پاکستاني ځواکونو له توند غبرګون سره مخ شي او پر ډزو یې ځواب ورکړی.
د دغو ډزو په پايله کې ۳ تنه وژل شوي او ۷ نور ژوبل شوي دي.
د پاکستان امنيتي چارواکو ویلي، د عامه نظم او امنیت ټینګولو لپاره یې د لاریون د مخنیوي په موخه پر خلکو اور غورځوونکي ګازونه او ربړي مرمۍ کارولې دي.
