د بلخ ولایت مرکز مزار شریف ښار کې د رابعه بلخي بازار د دې ولایت ښځینه صنعتګرو او متشبثانو ته ځانګړی شوی.
دا مهال دغه ځانګړي بازار کې شاوخوا ۳۰۰ ښځې په بېلابېلو برخو کې فعالیت کوي.
دغه سوداګرې ښځې د خپلو تولیداتو د ودې او ترویج لپاره په بازار کې د اسانتیاوو او تجهیزاتو د غوښتنې ترڅنګ، د ورته بازارونو په رامنځته کېدو ټینګار کوي.
متشبثه ښځه نجیبه خلیلي وايي: « زموږ ډېر فعالیت د ښځینه او ماشومانه جامو په برخه کې دی. موږ غوښتنه کوو چې دغه شان نور مارکېټونه هم د ښځو لپاره جوړ شي، ترڅو موږ او نورې ښځې هم وکولی شي خپل تولیدات په کې وپلوري.»
یوه بله متشبثه ښځه اسله نوابي وايي: « له امنیتي پلوه هېڅ ستونزه نه لرو، خو له اقتصادي او کاري پلوه ستونزې لرو. باید زموږ د کار لپاره سم سیسټم، اسانتیاوې او ماشینونه راوړل شي. هرڅومره چې وسایل ډېر شي، زموږ کار ښه پرمخ ځي.»
د رابعه بلخي بازار متشبثې ښځې سره له دې چې په بازار کې د بېلا بېلو توکو په جوړولو، تولید او پخولو بوختې دي، د خپلو چارو د لا پرمختګ لپاره د سرپرست حکومت او همکارو بنسټونو د ملاتړ غوښتنه کوي.
بلخ کې د رابعه بلخي بازار مسوول مدیره ناهیده وايي:« دلته د لاسي صنایعو، غالۍ اوبدلو، د غوړیو تولیدولو، رسټورانټ او شیریني پخولو برخې فعالیت لري چې په کې له ۳۰۰ تنو زیاتې ښځې کار او فعالیت کوي. د دې ځای ښځې تر ډېره د دوکانونو غوښتنه کوي؛ دوی غواړي دلته خپل دوکان او فعالیت ولري. موږ له حکومت او نورو بنسټونو غوښتنه کوو، که څه هم له موږ سره همکار دي، له دې وروسته هم خپلې همکارۍ ته ادامه ورکړي، د ښځو لپاره دغه شان نور ځانګړي بازارونه او مارکېټونه هم جوړ کړي، ترڅو لا ډېرې ښځې په کار او فعالیت بوختې شي.»
په ورته وخت کې د بلخ صنعت او سوداګرۍ ریاست مسوولین په سوداګریزه برخه کې د ښځو پر ملاتړ ټینګار کوي او دغه راز د ولایت پر کچه د ښځو لپاره د یوه بل ځانګړي بازار له پلان کېدو هم خبر ورکوي.
د بلخ ولایت د صنعت او سوداګرۍ ریاست مرستیال نصیر احمد نیازی وايي: « له ۲۵۰ تر ۳۰۰ تنې ښځې په رابعه بلخي کې فعالیت لري او همدومره نورې په خدیجة الکبرا کې هم فعالیت لري. د بلخ ولایت مسوولین تصمیم لري چې د ښځو لپاره یو بل مارکېټ هم جوړ کړي، ترڅو د دوی ستونزې په ټولیزه توګه حل شي. د دې مارکېټ لومړني کارونه مخته تللي او په نږدې وخت کې به پرانیستل شي.»
د بلخ په مرکز مزار شریف ښار کې رابعه بلخي او خدیجة الکبرا سوداګریز مرکزونه د ښځو لپاره هغه لوی ځانګړي شوي بازارونه دي چې دا مهال په کې سلګونه ښځې په لویو او کوچنیو سوداګریو بوختې دي.
