په ننګرهار ولایت کې د بهرنیو اسعارو پر کارونې جدي بندیز لګول شوی چې د مسوولینو په خبره، له سرغړونکو سره به قانوني چلن وکړي.
د ننګرهار امنیې قوماندانۍ مسوولین وايې، د ډېورنډ فرضي کرښې ته څېرمه ولسوالیو ټولو اوسېدونکو او کاروباریانو ته وروستی خبرداری ورکړل شوی چې تر دې وروسته د بهرنیو اسعارو او په تېره بیا د پاکستاني روپیو له کارولو ډډه وکړي او پر ځای یې افغانۍ وکاروي.
د ننګرهار امنیې قوماندانۍ مرستیال مولوي محمد طاهر مبارز وايي: « که چا د اسلامي امارت له دې پرېکړې سرغړونه وکړه، حتمن به عدلي او قضايي ارګانونو ته سپارل کېږي، کاروبار یې تړل کېږي او زندان ته به اچول کېږي. زموږ مبارزه به تر هغو ادامه ولري چې د بهرنیو اسعارو کارول صفر ته ورسوو. ترهغو چې په ټول ننګرهار او په ځانګړې توګه سرحدي ولسوالیو کې افغانۍ ترویج شوې نه وي او د کلدارو چلښت په بشپړه توګه بند شوی نه وي، زموږ هڅې به ادامه ولري.»
صرافان د کلدارو بندیدو برخه کې له سرپرست حکومت سره د همکارۍ ډاډ ورکوي او وايي، چمتو دي او هڅه کوي له هرې ممکنه لارې د افغانیو بشپړ ترویج ته زمینه برابره کړي.
صراف ظفر شینواری وايي: « ولایتي مسوولینو پرېکړه کړې او تمه کېږي چې دا به دومداره وي. موږ هم پوره هڅه کوو چې افغانۍ ترویج او عامه کړو. موږ مخکې هم همکاري کړې او بیا هم همکارۍ ته چمتو یو.»
د ننګرهار خلک له یوې خوا د افغانیو د ترویج په اړه د روانو هڅو له امله خوښ دي، خو ټینګار کوي چې د توکو د نرخونو کنټرولو لپاره هم باید مسوول چارواکي هلې ځلې زیاتې کړي.
د غني خېلو ولسوالۍ اوسېدونکي حفیظ الله وايي: « موږ په دې کار کې له حکومت سره اوږه په اوږه درېدلي یو. زموږ ولسونه د افغانیو د ثبات ساتلو او ترویج لپاره له دې پرېکړې خوښ دي. موږ غوښتنه کوو چې اسلامي امارت په خپله دې پرېکړه کلک ودرېږي.»
د همدې سیمې یو بل اوسېدونکی خان محمد وايي: « باید له دې سره د نرخونو کنټرول هم وشي. مهمه خبره دا ده چې زموږ ولس ډېر غریب دی، باید د جنسونو نرخونه په افغانیو هم په هماغه نرخ وپلورل شي چې په کلدارو پلورل کېږي.»
لعلپوره، مهمندره، غني خېل، دوربابا، نازیان او بټي کوټ د ننګرهار هغه ولسوالۍ دي چې لاهم راکړه ورکړه په کې د افغانیو پرځای په پاکستانیو کلدارو ترسره کېږي.
