د پاکستاني ځواکونو له خوا د تورخم لارې له تړل کېدو درې اوونۍ پوره شوې، خو له څو ځلې خبرو سربېره دغه لاره د مسافرو د تګ راتګ او سوداګریزې راکړې ورکړې پرمخ نه ده خلاصه شوې.
د دې لارې د تړل کېدو له امله پښتونخوا او پاکستان ته د تورخم له لارې د افغانستان صادرات او واردات درول شوي چې له امله یې په بازارونو کې د کرنیزو محصولاتو او تازه مېوو نرخونه بې ساري لوړ شوې دي.
یو شمیر کابل ښاریان له سرپرست حکومته غواړي چې پر بازارونو کنټرول ډېر کړي.
د کابل ښار یو تن اوسېدونکی عبدالله وايي:« خلک ډېر غریب، بېوزله او مظلوم دي، هېڅ نه لري. له یوې خوا لاره بنده ده، بله خوا روژه ده او له بلې خوا ګراني ده. پخوا مې مېوه چارک په ۱۰۰ افغانۍ اخیسته، اوس ۱۵۰ افغانۍ ده. حکومت باید بازار کنټرول کړي.»
د کابل ښار یو بل اوسېدونکی جمال وايي: « بېکاري ده، د تورخم لاره بنده ده او مزدوري هم نه شته. زه له تورخم څخه کابل ته په مزدورۍ پسې راغلی یم، خو دلته هم کار نه پيدا کېږي.»
یو شمیر مېوه پلورونکي او هټيوال هم مني چې د تورخم لارې له بندېدو سره په بازار کې د افغاني مېوو نرخونه ښکته شوي خو برعکس د پاکستاني مېوو نرخونه د پام وړ پورته شوي دي.
د دوی په خبره، د یو کارتن کینو او مالټو په بیه کې ۲۵۰ افغانۍ لوړوالی راغلی.
مېوه پلورونکی جمشېد وايي:« د پاکستان لارې بندېدو راهیسې مېوه ډېره لوړه شوې، په هره ټوکرۍ کې له ۲۵۰ تر ۳۰۰ افغانیو بیې لوړې شوې. له دې وړاندې یو کرېټ کینو په ۶۰۰ افغانۍ وې، خو اوس په ۱۰۰۰ افغانۍ راځي. له حکومت غوښتنه کوم له هغوی سره توافق وکړي او لاره خلاصه کړي.»
ترکاري پلورونکی عبدالاحد وايي:« د لارې له بندېدو سره زیاته قېمتي راغلې. پرون بامیه په۶۰۰ وه او نن په ۷۰۰ افغانۍ ده. هره کیلو کې ۳۰ تر ۴۰ افغانۍ توپير راغلی.»
د افغانستان او پاکستان د سوداګرۍ ګډې خونې مسوولین د سوداګرو پرمخ د تورخم لارې تړل د دواړو هېوادونو پر زیان ګڼي او زیاتوي، د تېرو کلونو پرتله پاکستان سره د سوداګرۍ کچه له نیمايي هم ښکته شوې.
د دې خونې مسوولین ډاډ ورکوي چې د یادې لارې د پرانیستلو لپاره یې هلې ځلې کړې او تمه لري چې په نږدې ورځو کې به تورخم لاره د مسافرو او سوداګریزو توکو پرمخ خلاصه شي.
د سوداګرۍ خونې مرستیال خان جان الکوزی وايي: « په دې وروستیو کې د ځینو دلایلو له امله پاکستان سره زموږ تجارتي او ټرانزیټي اړیکې خرابې شوې دي، نو له امله یې پاکستان سره زموږ داخلي تجارت کم شوی. یو وخت مو د ۲.۵ میلیارد ډالرو په ارزښت تجارت درلود، خو اوس ۸ سوه میلیون ډالرو ته ښکته شوی. ځینې داسې مواد دي چې موږ مجبور یو له پاکستان څخه یې راوړو، لکه تازه مېوې. د کال په دې فصل کې د افغانستان خپله مېوه او ترکاري نه رسېږي، ځکه نو له پاکستان څخه راوړل کېږي.»
د افغانستان او پاکستان د ګډې سوداګریزې خونې اجرائیوي رئيس نقیب الله ساپی وايي: « د خصوصي سکټور په کچه افغان سوداګرو او قومي مشرانو د پاکستان له سوداګرو او قومي مشرانو سره ناسته درلوده. دغې ناستې څه نا څه مثبت انګیزه جوړه کړه، ترڅو د دواړو خواوو ترمنځ خبرې پیل شي. د خبرو لړۍ پيل شوه او په څو ورځو کې به بیا سره کېني او تمه کېږي چې د دواړو خواوو خصوصي سکټور حکومتونه مجبور کړي چې لاره خلاصه کړي.»
د تورخم لاره شاوخوا ۲۱ ورځې وړاندې وروسته له هغې وتړل شوه چې د اسلامي امارت ځواکونو پر ډېورنډ فرضي کرښه خپلې خواته د امنیتي تأسیساتو جوړول پيل کړ، خو پاکستاني ځواکونو یې د مخنیوي لپاره برید وکړ. د دواړو خواوو ترمنځ وسله والو نښتو کې پر پراخ مالي زیان سربېره، ځان مرګ ژوبله هم واوښته.
